Мекежанов Еңілхан Сапаұлы

Мекежанов Еңілхан Сапаұлы - 1937 жылы 4 тамызда, Шығыс Қазақстан облысы, Зайсан ауданының Дайыр селосында дүниеге келген. С.М.Киров атындағы университеттің журналистика факультетіне келіп окуға түсті. 1963 жылы журналистика факультетін аяқтаған соң, қазақ телевизиясы мен радиосында 1976 жылға дейін, негізгі мамандығы журналист ретінде, редакторлық қызмет атқарған.

1976 жылдан бастап республикалық "Жалын" баспасында директордың орынбасары, бөлім меңгерушісі сияқты қызмет атқарады. жылы музыканы сүйе білуге, тыңдай білуге шақыратын "Жастық әуендері" атты тұңғыш кітабы жарық көреді. 1980 жылы "Жалын" баспасынан бөлініп шыққан "Өнер" баспасы бас редактордың орынбасары қызметін атқара жүріп, өнер жайында жазылған көркем және публицистикалық әдебиеттер үлкенді-кішілі форматтағы түрлі-түсті буклеттер мен альбомдарға авторлық текстер жазып, редакторлық жұмыстар атқарған. "Өнер" баспасынан бірінші болып жарық көрген "Ән көңілдің ажары" атты әндер жинағын құрастырған.

1987 жылы, Шара Жиенқұлованың қазақ билерінің шығу тарихы мен сахнаға қойылуы жайындағы "Сымбат" кітабының әдеби нұсқасын жазып шыққан. 1989 жылы музыканың өмірмен байланысын, әдебиет, кескіндеме сияқты өнер түрлерінін ара қатынасын қызықты фактілер негізінде дәлелдей отырып, тартымды баяндалатын, әйгілі композитор, Социалистік Еңбек Ері Дмитрий Кабалевскийдің музыка туралы "Три кита", "Үш алып және басқалар хақындағы" кітабын орыс тілінен аударады.1996-1997 жылдар аралығында, қазақ телевизиясына қайта оралып "Алатау" арнасында бөлім меңгерушісі болып қызмет атқарған.