Мемлекеттік қаржы бақылауы

Мемлекеттік каржы бақылауы - мемлекеттің қаржыны бақылау атқарымын пайдалануына негізделген мемлекеттік бақылаудың аса маңызды түрлерінің бірі; республикалық бюджеттің, республикалық бюджеттен тыс қорлардың атқарылуын, ақша айналысының ұйымдастырылуын, несие ресурстарының пайдаланылуын, мемлекеттік ішкі және сыртқы борыштың, мемлекеттік сақтық қорлардың жай-күйін, қаржы жеңілдіктері мен артықшылықтардың берілуін, мемлекеттік органдарға, ұйымдарға, кәсіпорындарға және мекемелерге бекітіліп берілген мүліктің және республикалық меншіктегі басқа да мүліктердің пайдаланылуын бақылау. Экономиканың барлық буындарында мемлекеттің бірыңғай қаржы саясатының мүлтіксіз жүзеге асырылуын бақылаудың басты тәсілдерінің бірі болып табылады. Қаржы нысандары мен әдістерінің көмегімен мемлекеттік ақшалай кіріс пен ақшалай қаражат қорларының заңды әрі дұрыс құралуын және мемлекеттің міндеттерін жүзеге асыру барысында олардың нысаналы түрде ұтымды да тиімді пайдаланылуын тексеруді қамтамасыз ету мақсатын көздейді. Республикалық және жергілікті атқарушы билік органдары, ұйымдар, кәсіпорындар мен мекемелер өздерінің қарамағына түскен республикалық мемлекеттік қаражаттың заңдылығын, республикалық бюджет алдындағы міндеттемелерінің, соның ішінде салықтар мен бюджетке басқа да міндетті төлемдердің толық және уақытылы орындалуына, есептің дұрыс жүргізілуіне және есеп-қисаптың дұрыс жасалуына идаралық бақылау жасауға тиіс. ҚР заңдарында белгіленген атқарымдар мен өкілеттіктердің аражігін ажыратуға сәйкес мемлекеттік каржы бақылауы Республикалық бюджеттің атқарылуын бақылау жөніндегі есеп комитетіне, ұлттық банкіге, Қаржы министрлігіне (Қазынашылық, Қаржы бақылауы, Салық, Кеден комитеттері) жүктелген