Миопатия

Уикипедия — ашық энциклопедиясынан алынған мәлімет
Навигацияға өту Іздеуге өту
Миопатия

Миопатия (myopathіa; грек. мио... және pathos – ауру) – бұлшық ет ауруының бір түрі. Миопатия тұқым қуалайтын аурулардың қатарына жатады. Миопатияның дамуына бұлшық ет клеткаларындағы зат алмасу процесінің бұзылуы, нуклеин қышқылы синтезделуінің өзгеруі, осы өзгеріс кезінде бұлшық еттердегі белоктар ыдырауының күшеюі негіз болады. Ал аурудың асқынуына жедел және созылмалы жұқпалы аурулар, жарақат, дистрофия, сондай-ақ, организмге шамадан тыс күш түсуі, т.б. әсер етеді. Миопатия кезінде метаболизмнің бұзылуының тұқым қуалайтын себептері табылып, соның нәтижесінде Миопатияның арнайы ферменттерінің функциясы өзгеріске ұшырап, науқас қанындағы сарысуда альдолаза, трансаминаза, креатинфосфокиназаның, т.б. ауытқуына (қалыпты жағдаймен салыстырғанда) әкелетіні анықталды. Миопатия үш үлкен топқа ажыратылады: иықжауырынбет Миопатиясы (немесе Ландузи – Дежерин формасы), ювенильді Миопатия (немесе Эрба формасы) және жалған гипертрофты Миопатия (немесе Дюшен формасы). 1-формасында бала ата-анасынан берілетін әр түрлі тұқым қуалайтын аурулармен ауырады. Мысалы, бала көзін ашып ұйықтайды (бұндай белгі ата - анасының біреуінде болады). 2-формасында жамбас пен аяқтың бұлшық еттері әлсізденіп, атрофияға ұшырайды да, бала жастайынан жүре алмай қалады. 3-формасы адамның Х-хромосомды тізбегінде тұқым қуалаудың рецессивті түрі ретінде байқалады. Миопатияның бұл ауыр формасымен тек ер балалар ауырады. Ауру белгісі ерте (алғашқы 5 жыл ішінде) басталады да, тез қарқынмен дамиды. Сондықтан ауру бала дистрофия немесе тыныс жолдарына түскен (респираторлы) инфекцияның әсерінен көп ұзамай қайтыс болады. Емі: глютамин қышқылын, антихолинэстераза препаратын, Е, В1, В6; В12 тобындағы витаминдерді қолдану. Сондай-ақ, науқасқа өзіне сәйкес донор тауып, қан құю да жақсы нәтиже береді.[1][2]

Сілтемелер[өңдеу | қайнарын өңдеу]

Дереккөздер[өңдеу | қайнарын өңдеу]

  1. Қазақ энциклопедиясы, 6 том
  2. Патологиялық анотомия терминдерінің орысша – латынша – қазақша түсініктеме сөздігі.- Ақтөбе. ISBN 9965-437-40-8