Моторландырылған әскерлер

Моторландырылған әскерлер (Моторизованные войска) — бұрынғы жаяу әскерлерден әлдеқайда өзгеше, жаңа қарумен және жоғары дәрежелі техникамен жабдықталған әскер. Бұл әскерлердің негізі танк емес, моторландырылған құрамалардан, бөлімдер мен бөлімшелерден тұрады. Олар автоматты атыс құралдарымен, жақын жердегі ұрыста танкілерге қарсы қолданылатын қуатты қарулармен жабдықталады, оның құрамында басқа әскер түрлерінің де бөлімдері болады. Моторландырылған әскерлер сауытты машиналармен ұзақ жолға жүре алады, ұрыс аймағында икемді және тез маневр жасайды. Қару-жарақ пен техниканың барлық түрлерімен, ракета, ядролық қарумен жабдықталған Моторландырылған әскерлер авиациямен бірлесе әрекет жасай отырып, ұрыстың бір түрінен екінші түріне тез көше алады. Олар қарсыластың кез келген қорғанысын бұзып аз уақыттың ішінде қарама-қарсы ұрыста жеңіп, қарсылас тыдына басып кіреді, қарсыластың су кедергілерін шабуылдап өтіп, басып алған жерді ұстап тұрады. Моторландырылған әскерлердің басқа әскер түрлерінен өзгешелігі, олар жыл мезгілі мен тәуліктің қай уақытында болса да, кез келген жерде өз машиналарымен де, жаяу да ұрыс қимылдарын жүргізеді. Моторландырылған бөлімдер мен бөлімшелер ұшақ пен тікұшақ аркылы десант ретінде түсірілуі де мүмкін. Олар негізгі күштен бөлініп, ұзаққа созылған ұрыс жүргізе алады. Бұрынғы кездегі жаяу әскердей тәулігіне 30-50 км емес, жүздеген километр жүреді. Моторландырылған әскерлер құрамында ракеталық бөлімшелер болады. Осыған орай моторландырылған дивизияның қуаты анағұрлым артып, атыс қуаты да күшейді.