Мұсылман Бауырластығы

МҰСЫЛМАН БАУЫРЛАСТЫҒЫ

Қажылық.

МҰСЫЛМАН БАУЫРЛАСТЫҒЫ – мұсылмандар арасындағы ынтымақ-бірлік. МҰСЫЛМАН БАУЫРЛАСТЫҒЫ Құран Кәрімнен бастау алады, онда: “Шын мәнінде, мұсылмандар туыс. Туыстардың арасын жарастырыңыз және Алладан қорқыңыз, сізге мейірімі түссін” (49/10) делінген. Мұхаммед пайғамбар (ғ.с.) хадисінде: “Бір-біріңізге қастық қылмаңыз, көкірек керіп, мақтанбаңыз. Әй, Алланың құлдары, туыс болыңыз” деп өсиет айтқан. Сондықтан мұсылмандар бір-біріне кешіріммен қарап, бауырластығын арттыруы тиіс. Хадистерінде “көршісі aш отырып, өзі тоқ болған кісінің мұсылман болмайтынын” ескерткен пайғамбар үмбеттерін шынайы бауырластыққа шақырған. Бауырластық дәнекері сенімнен туындайтын рухани сүйіспеншілік, бұл ұғым қазақ дүниетанымында “ақыреттік дос” аталып, айнымас, қалтқысыз бауырластықты білдіреді. Имани бірлік жүректер бірлігіне, ол қоғамдық бірлікке ұласады. Жамағатпен намаз оқу – бірлікке, ораза – бауырмалдыққа, зекет – қайырымдылыққа, қажылық – тұтастыққа шақырады. Аллаға иман келтірген мұсылмандар бір үйдің балаларындай бір-біріне бауыр болып, ортақ мақсат төңірегінде топтасады. Сондықтан Мұхаммед пайғамбар (ғ.с.) хадисінде: “Мұсылмандар бір-біріне бір қабырғаның кірпіш-тасындай қолдау көрсетеді” деп айтылған. Бүгінде мұсылман елдерінің бірлігін, өзара ынтымақтастығын нығайту және түрлі мәселелерді бірігіп шешуді қамтамасыз ету мақсатында “Ислам дүниесі лигасы”, “Ислам конгресі”, “Ислам конференциясы” ұйымдары жұмыс істейді.

МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫ

МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫ (Верный мұсылмандарының біріккен еңбек одағы) – әр түрлі ұлт өкілдері еңбекшілерінің бірінші бұқаралық ұйымы. Одақтың құрамында қазақ, ұйғыр, дүнген, татар, өзбек, қырғыз, т.б. ұлттардың жұмысшылары болды. МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫ Уақытша үкімет орнаған кезде 1917 жылы

5 мамырда құрылып, негізінен экономикалық және ағартушылық мақсаттарды көздеді. Одақтың құрылғаны жөніндегі хабар 

1917 жылы 24 мамырда Ташкентте шығып тұрған “Новая газетада” жарияланды. МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫ құрамы жағынан әртекті болды – кірпіш және тері илеу з-ттарының, жүн жуатын орындар, ұстаханалар мен басқа да ұсақ кәсіпорындардың жұмысшыларымен бірге оған қолөнершілер мен майдангерлер де кірді. Қыркүйек айында майдандық қара жұмыстардан оралған Верный мұсылмандарынан құрылған “Қара жұмысшылар одағының” кейбір мүшелері де МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫның жұмысына араласты. Одақтың жұртшылық арасындағы беделі тез өсіп, 1917 жылдың соңына қарай құрамында 600-дей мүшесі болды. Одақ озық ойлы, төңкерісшіл көзқарастағы авторлардың мақалаларын жариялап тұрған “Садақ” атты сатиралық журнал шығарды. Жаркентте А.Розыбакиев одақтың алғашқы уездік бөлімін ұйымдастырды. Верныйда Кеңес өкіметі орнаған соң,МҰСЫЛМАН ЖҰМЫСШЫЛАРЫНЫҢ БІРІККЕН ОДАҒЫ мүшелерінің елеулі бөлігі қызыл әскер қатарына өтті.

Сілтемелер

• Ислам
• Ислам конгресі
• Иман

Сыртқы сілтемелер

МҰСЫЛМАН БАУЫРЛАСТЫҒЫ

Дереккөздер

1. Қазақ энциклопедиясы, 6 том.