Мұханмеди Жолболдин

Құрық паркі

Құрық жағалау

Жолболдин Мұханмеди (1923 жылы 25 наурыз — 1980 жылдың 23 қараша) — cоғыс және еңбек ардагері, қоғам қайраткері. Маңғыстау мұнайын ашуға, Қарақия ауданының ашылуына атсалысып, көп еңбек сіңірген. Форт-Шевченко (1963), Жетібай (1965), Өзен (1969), Ералы (1971, 1975, 1979) қалалық, аудандық, поселкелік Кеңестің депутаты болып сайланған.

Майданда 1942 жылдың 11 наурызынан — 1943 жылдың 3-мамырына дейін болып, Соғыста көрсеткен ерлігі үшін - «За отвагу», «За победу над Германией», «20 лет Победы», «30 лет Победы», «60 лет вооруженных сил СССР», «100 лет В.И. Ленину»; еңбектегі ерлігі үшін - «За доблестный труд», «За трудовое отличие», «Победитель соцсоревнования-1973 года» медаль, төсбелгілерімен марапатталған.

Мұханмеди Жолболдин 57 жасында, 1980 жылдың 23 қарашасында ауыр науқастан қайтыс болған.

Өмірбаяны

• 1923 жылы 25 наурызда Маңғыстау облысы, Онды жерінде туған. Бекдашыдағы кәсіпшілік жұмысшыларының балаларына арналған 4 сыныптық мектепте оқыған.
• 1942 жылы 19 жасында ҰОС-на өзі сұранып аттанып, 152-атқыштар бөлімінің құрамында ұрысқа қатысқан.
• 1942 жылдың наурызының 11-нде оқу батальонына жіберіліп, 17-нде ант қабылдаған.
• 1942 жылы 5-қыркүйекте ауыр жараланып, госпитальға түседі. Жазылып шыққасын ұрыс даласына қайта оралады.
• 1943 жылы 23-қаңтарда қолынан жараланып, госпитальға түсіп, шынтағын, саусағын кестіріп, соғысқа жарамсыз болып елге оралған. Елге келгесін Таушықта НКВД-ға, хатшылық қызметке тұрады.
• 1945 жылдан КОКП мүшесі. 1949 жылы сауда мекемесіне (потребсоюзға) басшылық қызметке ауысады.
• 1951 жылы Қазақстан тұтынушылар одағының басқарма төрағасын даярлайтын курстан өтіп келгесін, 1952-55 жылдары Форт-Шевченкода рыбкоопта бастық болады.
• 1954-56 жж. Алматыдағы Қарғалы сауда техникумын бітіріп, сауда кооперативінің жоспарлаушы мамандығын алады.
• 1956-58 жылдары Мақатқа жұмысы ауысып, облыстық сауда базасына директор болып барады.
• 1957 жылы Киров атындағы Қазақ Мемлекеттік университетінің экономика факультетіне сырттай оқуға түсіп, 1962 жылы өнеркәсіп экономисі мамандығын алған.
• 1958 жылы Маңғыстау мұнай-газ барлау тресінің кадр бөліміне басшы болып барады. Содан кейін Құрықта (Ералы) материалдық-техникалық жабдықтау базасының бастығы болып 1974 жылдың 4-сәуіріне дейін жұмыс жасаған.
• 1974-1980 жылға дейін Ералиево аудандық кеңесі атқару комитетінің әлеуметтік қамту бөлімінің меңгерушісі болған.