Мұхит Ғалымұлы Қалымов

Қалымов Мұхит Ғалымұлы
Дүниеге келгені:	05.05.1931 Атырау облысы Индер аудан Мәмбет ауыл
Қайтыс болғаны:	03.11.2002 Алматы
Мансабы:	Ұстаз

Мұхит Ғалымұлы Қалымов (5.5. 1931, Атырау облысы Индер ауданы Мәмбет а. – 3.11.2002, Алматы) – кескіндемеші, ұстаз, Қазақстанның еңбек сіңірген өнер қайраткері (1989).

Ленинградтың (қазіргі Санкт-Петербург) кескіндеме, мүсін және сәулет өнері институтының кескіндеме факультетін (1964), осы институттың аспирантурасын (1970) бітірген. 1965 жылдан суретшілігімен қоса ұстаздық етті.

1965 – 1970 ж. Алматы көркемсурет училищесінде, 1970 – 1980 ж. Қазақ мемлекеттік педагогикалық институтының көркемсурет кескіндеме бөлімінде, 1980 – 1985 ж. Алматы архитектуралық-құрылыс институтында (қазіргі Қазақ бас сәулет-құрылыс академиясы) кескіндеме мен мүсін кафедрасын басқарды, 1985 – 1993 ж. Алматы театр-көркемсурет институтында (қазіргі Қазақ ұлттық өнер академиясы) кафедра меңгерушісі қызметін атқарды. 1993 жылдан. өмірінің соңына дейін осы институттың кескіндеме кафедрасының профессор болды.

Қалымов тарихи тақырыптарға, қазақтың белгілі өнер саңлақтары мен ірі қайраткерлердің бейнесін жасауға көп көңіл бөлді. Оның “Бабалар”, “Абылайхан”, “Сырым батыр”, “Исатай – Махамбет”, “Мұрат ақын”, “Құрманғазы”, “Қайран шешем” полотноларынан көпке тұлға болған ерлердің бейнесін көреміз. “Ғани Мұратбаев”, “Әуезов пен Ш.Айтматов”, т.б. портреттері бейнелеу әдісінің сонылығымен және адамның ішкі психологиялық жан-дүниесін ашудағы шеберлігімен ерекшеленеді. Бұдан басқа “Алғашқы қазақ атты әскері”, “Абылай хан билер ортасында”, “Көбік шашқан”, т.б. картиналарын салды.

Махамбет атындағы сыйл. иегері (1996).

Суретші туындылары Ә. Қастеев атындағы өнер мұражайында, Атырау, Астана, Қарағанды мұражайларында сақтаулы.