Нарымбай

Нарымбай – ортағасырлық қалашық орны. Байзақ ауданы Байзақ ауылынан 7 км шығыста, Тараз – Тегістік автокөлік жолынан солға қарай 0,5 км жерде. 1936 ж. КСРО ҒА Қазақстан филиалы мен КСР ҒА Материалдық мәдениет тарихы институтының археологиялық экспедициясы (жетек. А.Н. Бернштам) ашқан. 1986 ж. Тараз археологиялық экспедициясы (жетек. К.М. Байпақов), 2000 ж. Оңтүстік Қазақстан кешенді археологиялық экспедициясы (жетек. К.М. Байпақов) зерттеу жұмыстарын жүргізген. Нарымбай «төрткүл» түріндегі қалаларға жатады. Қазіргі орны бұрыштары төрт тарапқа қараған ромб тәрізді келген төбешік. Шетінен есептегенде көл. 240 м. Ішкі бөлігі тегіс, құрылыс іздері байқалмайды. Қалашықты барлық жағынан ені 1,5 м, үсті 3 – 5 м, табандығы кейде 20 м-дей болатын жал қоршап жатыр. Беткейлері еңістеу үйінді жалдың үстінде биікт. 0,4 – 0,5 м, орташа ұзындығы 15 м-дей, ені 10 м шамасында мұнара орнының қалдықтары бар. Жалдың сыртқары бөлігінде бұрыш мұнаралары орналасқан. Олар жал бойындағы мұнаралардан көлемділеу. Оңтүстік-батыс және солтүстік-батыс үйінді жалдарда алтыдан, солтүстік-шығыс және оңтүстік-шығыс жалдарда төрттен мұнара орындары бар. Төрткүл ені 10 м, кей жерлері 25 м-дей болатын, тереңд. 0,8 м ормен қоршалған. Құрылыс қалдықтарына және табылған заттарға (құмыра т.б. сынықтары) қарағанда Нарымбайды халық 8 – 12 ғасырларда мекендеген. Олар егін, мал шаруашылықтарымен, қолөнермен шұғылданған.