Николаев жер асты су кені

Николаев жер асты су кені - Қаскелең өзенінің сол жағалауында, Алматы облысының Қапшағай қаласынан оңтүстікке қарай 12 км жерде орналасқан.

Қапшағай қаласын және демалыс аймақтарын шаруашылық-ауыз сумен қамтамасыз етуге байланысты барланған. Кен орны қайыршықтар мен саздақтар қабаттары бар түрлі түйіршікті құммен толған жоғары төрттік кезеңнің аллювийлі шөгінділерінде шоғырланған. Қиманың төменгі бөлігінде қалыңдығы 8-20 м болатын кесектасты-малтасты тау жыныстары қабаты бар. Қабаттың жалпы қалыңдығы 53-66 м, жер асты суы 6,9-7,6 м тереңдікте жатыр. Ұңғымалардың дебит су деңгейі 3,9-10 м төмендегенде 34,5-тен 66,6 л/с болады. Жер асты суы Қаскелең өзенінің және каналдардан сүзілген сумен толығады.

Судың құрамы

Минералд. 0,34-0,56 г/л, хим. құрамы бойынша сульфатты-гидрокарбонатты натрий-кальцийлі. Солтүстік-батыс бағытта құрғақ қалдықтар мөлшері ұлғайып, минералдығы артады (2,4-2,6 г/л). Суында фтордың мөлшері жоғары (1,1-6,0 мг/л) және бактериол. жағдайы тұрақты емес. Сондықтан тұтынушыға беретін суды фторсыздау және заласыздандыру керек. Сулы горизонттың қалыңдығы 51 метр. Пайдаланатын су қоры гидродинамикалық әдіспен бағаланған. Жобалық сутірек Қаскелең өзенінен бойлай қатар түзелген 19 ұңғымадан (ара қашықтары 400-600 м) тұрады. Сутірек Қаскелең өзенінен орта есеппен 1100 м алшақта орналасқан. Ұңғымалардың тереңдігі 80-100 м. Кен орны 1976 жылдан пайдалануда. Қазір сутірек тәулігіне 10,5 мың метр куб су береді.