Нысанов

Уикипедия — ашық энциклопедиясынан алынған мәлімет
Навигацияға өту Іздеуге өту

Нысанов, Нсанов, Батыс Елемес – мұнай-газконденсат кені. Бейнеу ауданында, Опорная стансасынан оңтүстік-шығыста 40 км жерде орналасқан. Кен 1987 ж. ашылған. Төменгі бор мен жоғарғы юраның мұнайлы көтерілімі ендікке жуық бағдарланған брахиантиклиналь. Табиғи сыйымдылықтың түріне қарай барлық иірімдер қабаттық, тектоникикалық қалқаланған, литологиялық шектелу элементтері байқалатын болып қалыптасқан. Коллекторлары терригендік, саңылаулы. Мұнайлы иірімдерде жалпы тиімді қалыңдықтар 1 – 35 м-ге, мұнайға қаныққаны 1 – 20,2 м-ге дейін өзгеріп отырады. Иірімдердің биіктігі 1,6 – 32,5 м-ге дейін ауытқиды. Мұнайда еріген газ құрамында 55 – 85% метан, 5,4 – 14% этан, 1,9 – 7% пропан, 1,3 – 5,2% бутан, 2,6%-дай метанның жоғары гомологтары болады. Газ құрамында азот (1,75%), өте аз мөлшерде көмір қышқыл газы бар. Қабат сулары хлоркальций типті тұздық түрінде. Иірімдердің режимі мұнайда еріген газдың білінуімен серпімді суарынды. Кен пайдалануға 1996 ж. берілген.[1]

Дереккөздер[өңдеу | қайнарын өңдеу]

  1. Маңғыстау энциклопедиясы, Алматы, 1997;