Нұзхат әл-Мұштақ фи-Ихтирақ әл-Афақ

“НҰЗХАТ әл-МҰШТАҚ ФИ-ИХТИРАҚ әл-АФАҚ” (“Жиһанкездіктен торыққан адамның көңіл көтеруі”) – ортағасырлық тарихи-геогр. шығарма. Оны Сицилия королі Роджер ІІ-нің (1130 – 54) тапсыруы бойынша (кейде “Роджердің кітабы” деп те аталады) араб географы Әбу Абдаллаһ Мұхаммед әл-Идриси көмекшілерімен бірлесе отырып 1154 ж. жазған. Шығарма 7 климаттық белдеулерге бөлінген құрлық пен теңіздердің сипаттамасынан тұрады. Қазақ жерін мекендеген түргештер, оғыздар, қимақтар, қарлұқтар, қыпшақтар, т.б. түркі тайпаларының орналасуы, қамалдары, сауда қатынастары, тұрмыс-тіршілігі мен мәдениеті жайлы құнды мағлұматтар бар. 70 карта – “Сурат әл-ард” (“Жердің келбеті”) берілген. Шығарманың белгілі 6 нұсқасы Париж, Оксфорд, Стамбұл, Каир, София және Санкт-Петербург қ-ларындағы кітапханаларда сақтаулы.