Нұрсерік Кәрімұлы Шәріпов

Нұрсерік Кәрімұлы Шәріпов (13 қазан 1965 жыл, Ертіс қаласы, Павлодар облысы) — қазақстандық заңгер, 2022 жылдан бастап Қазақстан Жоғарғы Сотының Азаматтық істер жөніндегі сот алқасының төрағасы.

Білімі

С.М. Киров атындағы Қазақ мемлекеттік университетінің заң факультетін (1990) заңгер мамандығы бойынша; М.Х. Дулати атындағы Тараз мемлекеттік университетінің экономика факультетін (2006) экономика бакалавры дәрежесімен бітірген.

Қазақ, орыс және неміс (сөздіктің көмегімен) тілдерін біледі.

Еңбек жолы

1988 жылдан - С.М. Киров атындағы Қазақ мемлекеттік университетінің заң факультетінде комсомол котитетінің хатшысы. 1990 жылдан - С.М. Киров атындағы Қазақ мемлекеттік университетінің әкімшілік құқық кафедрасының ассистенті. 1992 жылдан - ҚР Президенті Аппаратының және Министрлер кабинетінің азаматтық және рақымшылық жасау жөніндегі бөлімінің референті. 1995 жылдың наурыз айынан - ҚР Президенті Аппаратында рақымшылық жасау бөлімінің аға референті болды.

1995 жылдан 2007 жылға дейін Алматы қаласының Медеу ауданы (бұрынғы Фрунзе ауданы) сотының судьясы қызметін атқарды.

2007 жылдан 2008 жылға дейін Алматы қаласының мамандандырылған ауданаралық әкімшілік сотының төрағасы болды.

2008 жылдан 2010 жылға дейін Маңғыстау облысының мамандандырылған ауданаралық экономикалық сотының төрағасы болды.

2010 жылдан 2012 жылға дейін Маңғыстау облыстық сотының апелляциялық сот алқасының төрағасы болды.

2012 жылдан 2017 жылға дейін Оңтүстік Қазақстан облыстық сотының төрағасы болды.

2017 жылдан 2018 жылға дейін ҚР Жоғарғы Сотының жанындағы Соттардың қызметін қамтамасыз ету департаментінің басшысы қызметін атқарды.

2018 жылдан 2021 жылға дейін Қарағанды облыстық сотының төрағасы болды.

2021 жылғы желтоқсаннан бастап ҚР Жоғарғы Сотының судьясы болып қызмет атқарады. 2022 жылғы 31 қаңтардағы ҚР Президенті Жарлығымен Жоғарғы соттың азаматтық істер жөніндегі сот алқасының төрағасы қызметіне тағайындалды.

Марапаттары

«Ерен еңбегі үшін», «Мінсіз қызметі үшін» медальдарымен, «Құрмет» орденімен және бірқатар мерекелік медальдармен марапатталған.

Жеке өмірі

Ұлты — қазақ. Әкесі - Шәріпов Кәрім (1934 жылы туған), зейнеткер, кеңшар бөлімшесінің бастығы қызметін атқарған. Анасы - Әбдірахманова Ағиша Құсайынқызы (1937 жылы туған), зейнеткер, кеңшар жұмысшысы болған.

Үйленген. Жұбайы - Арыстанова Райхан Өсімбайқызы (1968 жылы туған), жеке кесіпкер. Қызы - Шәріпова Әсел Нұрсерікқызы (1988 жылы туған).