Нұрхан Исаұлы Исаев

Нұрхан Исаұлы Исаев
Туған күні
Қызметі	Профессор, ішкі істер қызметінің полковнигі.
Марапаттары мен сыйлықтары	Қажырлы еңбегі үшін бірнеше рет КСРО, ҚР ІІМ және атқарушы билік органдарының құрмет белгілерімен және 15-тен астам медальдарымен марапатталған.

Нұрхан Исаұлы Исаев - (5 қазан 1940 жыл, Шалқар қаласы) профессор, ішкі істер қызметінің полковнигі.

Өмірбаяны мен еңбек жолдары

Орта мектепті үздік бітіргеннен кейін еңбек жолын автокәсіпорын жүргізушісінен бастады. Орск қаласындағы №1 техникалық училищесін "Өнеркәсіптік кәсіпорындарды электрлендіру" мамандығы бойынша қызыл дипломмен бітірген соң, Орск мұнай өңдеу зауытының Орталық тарату станциясында электрик-диспетчер болып жұмыс істейді.

• 1960-1962 жылдар - Кеңес әскері қатарында әскери борышын өтеген.
• 1962-1967 жылдар - Қарағанды политехникалық институтын бітіріп, осы институттың "Тау кен құрылыс-жол машиналары" кафедрасындағы аға инженер-оқытушылыққа қалдырылған.
• 1967-1996 жылдар - КСРО көмір өнеркәсібі басқармасының аға инженері, Қазақ КСР Ғылым академиясының Қарағанды металлургия ғылыми-зерттеу институтында бас инженер болып еңбек етеді.
• 1969 жылы арнайы қаулыға сәйкес ішкі істер органдарына жұмысқа жіберіледі. Жолды қадағалау инженері, Ақтөбе облыстық Ішкі істер басқармасы Мемлекеттік автоинспекциясының батальон командирі, Қарағанды облыстық Мемлекеттік автоинспекциясы басқармасының бастығы қызметтерін атқарды (1969-90).
• 1990 жылы Талдықорған облыстық Ішкі істер басқармасы бастығының орынбасары қызметінде жүргенде КСРО Қарағандыдағы Милиция жоғары мектебінің ректоры қызметіне тағайындалады.
• 1993 жылы Қазақстан Республикасы ІІМ Мемлекеттік автоинспекциясы бас басқармасының бастығы қызметіне тағайындалды. Осы жылы ҚР Министрлер кабинетінің шешіміне сәйкес ол басқарған ІІМ МАИ Бас басқармасы Женева қаласындағы (Швейцария конфедерациясы) Халықаралық жол қозғалысы ұйымында Мемлекет мүдделерін қорғаушы Қазақстан Республикасы Үкіметінің өкілетті органы болды.
• 1995 жылы Қазақстан Республикасы Үкіметінің шешіміне сәйкес ол Швейцариядағы Женева Халықаралық жол қозғалысы ұйымының штаб-пәтеріне халықаралық шенеунік (өкіл) ретінде жіберіледі. Үш жылдан астам сол мекеменің Вице-президенті - заң комиссиясының төрағасы қызметін атқарды және кеден мәселелері бойынша БҰҰ Ішкі Көлік Комитетінде Қазақстан Республикасы Үкіметінің өкілі болды (1995-1998). Егеменді Қазақстанның дүниежүзілік қатынастар жүйесіне интеграциялануына елеулі үлес қоса отырып, олардың халықаралық-құқықтық базасын жетілдіру ісіне еңбегін сіңірді.
• Швейцариядан оралғаннан кейін, Қазақстан Жүргізушілер одағы орталық кеңесінің Вице-төрағасы қызметін атқарды. Оның бастамасымен 1998 жылы штаб-пәтері Қазақстан Республикасында орналасқан "Еуразиялық Автомобилистер Альянсы" Халықаралық ұйымы құрылды. Осы ұйымның Бас хатшысы қызметіне тағайындалды.
• 2002 жылдан бері М.Тынышпаев атындағы Қазақ көлік және коммуникациялар академиясының әкімшілік-кадр жұмысы жөніндегі проректоры қызметінде еңбет етуде.

Марапаттары мен жетістіктері

• Қажырлы еңбегі үшін бірнеше рет КСРО, ҚР ІІМ және атқарушы билік органдарының құрмет белгілерімен және 15-тен астам медальдарымен марапатталған. Қарағанды облысы халық депутаттары кеңесінің депутаты болып сайланған.
• 20-дан астам ғылыми еңбектері жарық көрген.
• 2005 жылғы сайлауда ҚР Президентіне кандидаттыққа Н.Ә.Назарбаевтың сенімді өкілі болды.
• Екі рет ел Президентінің қолынан құттықтау хаттарын алған.
• "Қарағанды қаласының құрметті азаматы", КСРО және ҚР ІІМ еңбек сіңірген қызметкері, ҚР ЖҒА корреспондент-мүшесі, заң ғылымдарының кандидаты, профессор, милиция полковнигі.