Орда қыздар училищесі

Орда қыздар училищесі — 1883 ж. жергілікті қыз балаларға арнаулы-орта білім беру мақсатында Орда қаласында ашылған оқу орны. Арнайы бөлінген 2150 сом қаржыға мектеп үйі сатып алынған, сондай-ақ оқу орнының қажетіне жарату үшін жыл сайын қазынадан 2555 сом ақша жұмсалған. Мектеп жанынан 20 орындық жатақхана-интернат ашылған. Мектепке алғашқы жылы 22 шәкірт қабылданған, оның 7-і қазақ, 15-і орыс қыздары.

1890 ж. 12 шілдеде мектеп үйі өртеніп кеткен.

1891 ж. 2854 сом 48 тиынға жаңа мектеп үйі салынады.

1894-95 оқу жылында мұнда 14 қазақ қызы оқыған.

1911 ж. 1 қыркүйекте Ордада екінші бастауыш қыздар мектебі ашылды. Оның жанында 10 орындық интернат болды. Алғашқы жылы оған 3 қазақ, 1 татар, 16 орыс қызы оқуға келді. Осы оқу орнында қоғам қайраткері А.Оразбаева мен инженер-металлург Мәдина Бегалиева және т.б. жұртшылыққа танымал тұлғалар білім алған.