Орысқазған газ-мұнай кен орны

Уикипедия — ашық энциклопедиясынан алынған мәлімет
Jump to navigation Jump to search

Орысқазған газ-мұнай кен орныКаспий маңы ойысының оңтүстік-шығыс ернеуі маңы өңіріндегі газ-мұнай кен орны. Атырау қаласынан солтүстік шығыста 230 км-де орналасқан, 1979 жылы ашылған.

Геологиялық құрылымы, сипаты[өңдеу]

Кен орны үш қанатты тұзкүмбезді құрылымнан орын алған. Төменгі бор, ортаңғы юра, пермь-триас шөгінділері мұнайлы. Мұнайлы горизонттардың екеуі неокомда, жетеуі ортаңғы юрада. Пермь-триастағы жеті өнімді горизонттың төртеуі мұнайлы, үшеуі газды-мұнайлы. Өнімді горизонттардың жатыс тереңдіктері: неокомдікі -208-248 м, ортаңғы юрада -295-570 м, пермь-триаста -843-957 м. Мұнай жатындарының биіктіктері, тиісінше, 6,5-10 м, 7,5-52,5 м, 22,5-63 м, пермь-триастағы газды жатындікі 17,5-19,5 м. Су-мұнай жапсарларының белгілері осы ретте -124,5-161,5 м; -218,4-495 м; -813-866,5 м. Жатындар қойнауқаттық, тектоникалық тұрғыдан қалқаланған, сонымен қатар қойнауқаттық, стратиграфиялық және литологиялық тұрғыдан қалқаланғандары да бар. Мұнайлы горизонттар терригендік таужыныстардан құралған, жинауыштары кеуекті.

Қанығу сипаты[өңдеу]

Мұнайға қаныққан қалыңдық неоком горизонттарында 1,4-1,9 м, юрада 2,7-9,5 м, пермь-триаста 0,6-8,4 м, газға қаныққан қалыңдық 1,6-5,6 м. Жинауыштардың ашық кеуектілігі 19-25%, өтімділігі 0,006-2,024 мкм2. Мұнайға қанығу коэффициенті 0,45-0,85, газға қанығу коэффициент 0,66-0,68. 7 мм штуцердегі мұнайдың бастапқы шығымдары 1,2-62 м3/тәу. Бастапқы қойнауқаттық қысым 1,55-9,64 МПа, температура 17-35°С.

Құрамы[өңдеу]

Мұнайдың тығыздығы 807-895 кг/м3, құрамында 0,46-0,655% күкірт, 0,8-2,85% парафин, 6,92-10-,84% шайырлар, 0,10-3,95 асфальтендер бар.

Газдың құрамы: метан -62,56-75,36%, этан -14,02%-ға дейін, пропан -14,02%-ға дейін, изобутан -5,06%, бутан -0,63%, пентан мен жоғарғылар -0,64%, көмірқышқыл газы -4,09%.

Жатындардың режимі суарынды. Хлоркальцийлі қойнауқаттық суларының тығыздығы 1016-1161 кг/м3. Кен орны 1986 жылдан бері игерілуде, 2003 жылы бұл кенорынға Берген Жоламановтың есімі берілді.[1]

Дереккөздер[өңдеу]

  1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1