Отырықшыландыру жөніндегі республикалық комитет

Отырықшыландыру жөніндегі республикалық комитет – үкіметтік мекеме. 1930 ж. қаңтарда Қазақ АКСР-і ХКК-нің жанынан құрылған. К-тке көшпелі және жартылай көшпелі қазақтарды отырықшыландыру, мал, егін ш-тарын жедел дамыту, отырықшыланған аудандарға көмекке республиканың барлық мемл. шаруашылық органдарын жұмылдыру және тиісті заң жобалары жөнінде ұсыныстар енгізіп, отырықшыландыру жоспарының орындалу барысын бақылау тапсырылды. О. ж. р. к-тің отырықшыландыру жөніндегі окр. к-ттері мен ауд. комиссиялары болды. К-т отырықшыланған шаруаларға несиеге бөлінген қаржының жұмсалуын бақылау, шаруаларды а. ш. құрал-жабдықтарымен қамтамасыз ету, отырықшыланған аудандардағы ұжымшарларға маман кадрлар жіберу жұмыстарымен айналысты. Ұжымдастыру науқанымен қатарласа жүргізілген отырықшыландыру саясаты “кедей-орташа шаруашылықтар 100% отырықшыланатын болсын” деген әкімшіл-әміршіл ұрандармен жүргізілді. Ойсыз, біліксіз қабылданған партия қаулылары қазақ халқының өмірінде қасіретті ауыр іздер қалдырды. Мал шаруашылығы құлдырап, бұрын-соңды болмаған шығынға ұшырады. Бар күн көрісі малға қарап отырған қазақ шаруалары жаппай ашаршылыққа ұшырады (қ. Көшпелі және жартылай көшпелі қазақ шаруаларын отырықшыландыру). Көшпелі қазақтардың басым көпшілігі күштеп отырықшыланып, к-т алдына қойылған міндет орындалуына байланысты Қазақ КСР-і ХХК 1935 ж. қаңтарда к-т пен оның жергілікті органдарын таратты.