Оқжатар

Уикипедия — ашық энциклопедиясынан алынған мәлімет
Навигацияға өту Іздеуге өту

Оқжатар(магазин) — атыс қаруындағы патрондар орналасатын және оны ұңғыға жіберу алдында айдауыш сызығына жылжытатын арнайы құрылғы. Оқжатардың пайда болуы қарудың ату жылдамдығын айтарлықтай көтерді. Оқжатар атыс қаруының әр түрлі калибрлерінде, сондай-ақ кіші калибрлі зениттік автоматты зеңбіректерде кенінен пайдаланылады. Олар қарумен біріктіру орны мен байланысу сипатына, олардағы патрондардың пішіні мен орналасу тәртібіне қарай жіктеледі. Қарумен біріктіру орнына байланысты мынадай типтері бар: ұңғыастылық, дүмбілік, орталық (қарудың орталық бөлігінде ұңғы ойығының касында орналасқан). Ең көп тарағаны орталық оқжатарлар. Байланысу сипатына байланысты оқжатар ауыстырылатын, ауыстырылмайтын және әмбебап болып бөлінеді. Оларды тез жабдықтау үшін арнайы оқтізерлер пайдаланылады. Қазіргі оқжатар: пішініне қарай — дискілі, барабанды және қорапты; патрондардың орналасу тәртібіне қарай — бір қатарлы және көп қатарлы болып бөлінеді. Автоматты қарудағы патронды оқжатарлық жіберу автоматты емес қарулардан алынған. Ресейде бірінші рет оқжатарды 19 ғ-дың 80 жылдары С.И.Мосин жасаған және ол өзі жасаған винтовкада қолданып көрген.[1]

Дереккөздер[өңдеу | қайнарын өңдеу]

  1. Қазақ тілі терминдерінің салалық ғылыми түсіндірме сөздігі: Әскери іс. Алматы:"Мектеп" ААҚ , 2001