Оқ-дәрілерді таңбалау

Оқ-дәрілерді таңбалау (маркировка боеприпасов; неміс тілінде markieren белгілеу, таңба кою) — бояумен оқ-дәрі элементтеріне (снарядтар, авиабомбалар, ракеталар, торпедалар, инженерлік миналар және т.б.) және олардың сауытына жағылатын шартты белгілер немесе жазулар жүйесі. Белгілермен және ерекшелендіретін бояуларымен бірге оқ-дәрілерді таңбалау оқ-дәрілерді пайдалану мен олармен жұмыс істеуде ескерілетін сипаттамалары мен олардың қолданысын аныктауға мүмкіндік береді. Оқ-дәрілерді таңбалау тәртібін оқ-дәрімен жабдықтайтын тиісті органдар белгілейді және техникалық құжаттарда көрсетіледі. Қарулы күштерде оқ-дәрілерді таңбалау үшін орыс алфавиті, араб және рим цифрлары, өлшеу белгілері (+ немесе -) және жазулар пайдаланылады. Олар қорғаныс министрлігінің базаларында, арсеналында, өндіріс зауыттарында қара бояумен салынады. Ол өнімнің атын (индекспен, шифрмен немесе таңбамен), жасаған зауыт шифрын, жарғыш зат шифрын, жарылғыштың таңбасын, өнімді жинаған жыл мен база нөмірін көрсетеді. Сонымен қатар оқ-дәрілерді таңбалау оқ-дәрі түрін сипаттайтын басқа да мәліметтерді бере алады. Оқ-дәрілерді таңбалауға қосымша ретінде ерекшелендіретін бояулар алынады. Олар тегіс немесе белгілі бір түспен сақина жолақтары ретінде салынады. Үгіт-насихат снарядтары түгел қызыл түске, тәжірибелік және инертті жабдықтағы снарядтар қара түске боялады. Снарядтарға салынған сақина түстері: ақ—жарық түсіргіш снарядты, қызыл—өртегіш снарядты, көк—бетон бүзар снарядты білдіреді. Ерекшелендіретін бояулар жарылғыштарға, түтандыру құралдарына, жарық және белгі беру құралдарына да жағылады.