Пенелопа

Пенелопа
	Пенелопа
	гр. Πηνελόπεια
	; Ағылшын журналындағы сурет, 1895 ж.
Туған жері	Акарнания
Ұлты	грек
Әкесі	Икарий
Анасы	Перибея
Жұбайы	Одиссей
Балалары	Телемах, Аркесилай, Полипорт

Пенелопа — Итака патшасы Одиссейдің әйелі, Гомердің Одиссеясындағы басты кейіпкерлердің бірі.

Оның әкесі Икарий спарталық патшаның тұқымы болған, бірақ ағасы оны Пелопоннестен қуып жіберген.^[1]

Итакаға келін болып түскен Пенелопа Одиссейге Телемах есімді ұлды туады. Жуық арада Троя соғысы басталады және Одиссей оған аттанады. Ал соғыс аяқталғанда, жұбайынан жиырма жыл бойы хабар болмайды.

Гомерде

Одиссей Итакада жоқ кезінде оның сарайына Пенелопаға құда түсіп жүрген талай-талай үміткер күйеулер жиналады. Олар Пенелопа өзіне жұбай таңдап алғанша ешқайсысы Одиссейдің үйінен кетпейтіндігін айтып, той-думан өткізе бастайды. Аруға жұбай болуға кім лайықты деген мәселенің төңірегінде айтысып жүріп, сарайдың дүние-мүлкін талан-таражға салып жатқан. Пенелопа болса, асыл түкті жамылғы тоқып біткен соң ғана олардың біреуін таңдайды деп уәде береді. Бірақ бұл күйеусымақтардың ешқайсысына тұрмысқа шықпау үшін ойлап тапқан амалы болды, ол күндіз тоқумен айналысса да, түнде сол тоқығанын қайта тарқатып жіберетін. Ал ұлы Телемах әкесін іздеумен болып, ұзақ жолға шығады.

Бірнеше жылдан соң Телемах оралады. Одиссей де өз үйіне жолын тапты, бірақ ешкім танымас үшін ол таяққа сүйенген қауқарсыз қарт кейпінде жүреді. Бұл сырды тек Телемах пен Эвмей деген кісі білді. Одиссей мен Эвмей сарайға кірді. Пенелопа қартты байқағанда, одан Одиссей жөнінде сұрай бастады. Жолаушы Одиссейді бұдан жиырма жыл бұрын көргенін айтқанда, Пенелопа жылап жіберді.

Бірнеше күннен кейін Пенелопа Одиссейдің қазынасында сақтаулы тұрған бауыры қатты садақты үміткер күйеулердің алдына алып келеді. Кімде-кім осы садақты тартып, жебені он екі сақинаның көзінен дәл өткізсе соған тұрмысқа шығамын, деп айтады. Садақтың екі ұшын қанша рет игенімен, ешкім де кернеуін тарта алмады. Садақты иіп көруін қарт та сұрайды. Бәрі күледі, ал Телемах анасынан өз бөлмесіне кетуін өтінеді. Ол кеткенде, қарт садақтың кернеуін тартып, нысанаға дәл тиеді. Бәріне қырғын салып біткенде, әйеліне кім екенін ашып айтады.^[2]