Пигмейлер

Пигмейлердің жайғасуы

Пигмейлер (грек. жұдырықтай деген мағына береді) — Орталық Африкадағы халықтар тобы. Жалпы атаулары жоқ. Заир, Руанда, Бурунди, Уганда елдерінде Пигмейлерді тва, Габон, Конгода бинга (бабинга), Камерунда бибайя, гиелли, ал Итури өз. жағалауларын мекендейтін халықтар оларды мбути деп атайды.

Жалпы саны 300 мыңнан астам (2003). Антропология жағынан орталық африкалық нәсілге жатады. Пигмейлердің бойы аласа (144 — 150 см), түстері ашық қоңырқай, талпақ танау, бұйра шашты, жұқа ерінді, кеуделі, аяқ-қолдары қысқа болып келеді. Банту тілдері тобындағы бірнеше тілде сөйлейді. Негізгі кәсіптері — аңшылық, терімшілік және балықшылық. Дәстүрлі қару-жарағы — садақ. Аулаған аңдарын көбіне көрші халықтармен дәнді дақылдарға айырбас жасап күнелткен. Алғашқы қауымдық құрылыстың дәстүрлері сақталған. 3 — 4 отбасы болып белгілі бір аумақта көшіп те жүреді. Аласа күрке үйлерде (ағаш және ағаш бұтақтарынан тұрғызылған) тұрады. Қазіргі уақытта біраз бөлігі отырықшылыққа көшіп, еуропалық киімдер кие бастаған. Аңшылық, батырлық сюжеттерге негізделген ауыз әдебиеті сақталған.

Дереккөздер

• «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VII том