Придорожное газ кен орны

Уикипедия — ашық энциклопедиясынан алынған мәлімет
Навигацияға өту Іздеуге өту

Придорожное газ кен орныШу-Сарысу шөгінді алабының Қақпансор ішкі ойысындағы газ кен орны. Жезқазған қаласының оңтүстігінде 260 км жерде 1972 жылы ашылған.

Геологиялық құрылымы[өңдеу | қайнарын өңдеу]

Кен орны ендікке жуық бағыттағы жарылым бойындағы брахиантиклин қатпарынан орын алған. Фаменнің шұбар түсті, қызыл түсті терригендік шөгінділерінің мүжіліп-шайылған беті бойынша құрылымның өлшемдері - 2300 м-лік изогипса) 9x2,5 км, амплитудасы 210 м. Кен орны фамен жікқабатының құмтастары мен алевролиттерінен және Серпухов жікқабатының жарықшақты әктастарынан орын алған қойнауқаттық, тектоникалық тұрғыдан қалқаланған екі жатыннан тұрады. Фамен жатынының күмбездегі тереңдігі 2400 м. Газ-су жапсары -2285 м-лік белгіде, жатынның биіктігі 140 м.

Жатыс сипаты[өңдеу | қайнарын өңдеу]

Өнімді горизонттардың жалпы қалыңдығы 129 м, тиімді қалыңдығы 37,56 м. Жинауыштары жарықшақты-кеуекті типті, кеуектілігі 7%, шеткі мәндері 3%—18% арлығында, өтімділігі 0,038 мкм3. Газ-су жапсарының -1101 м-лік тереңдікте қабылданған белгісі бойынша жатынның биіктігі 107,5 м. Газ қабатының жалпы қалыңдығы 102 м, тиімді қалыңдығы 71,4 м. Жинауыштары тығыз, жарықшақты ұсақ және орта кристалды әктастардан құралған, бұлардың кеуектілігі төмен (3,78%). 22,6 мм-лік штуцердегі газдың бастапқы шығымы 96 мың м3/тәу. Бастапқы қойнауқаттық қысым 15,1 МПа, температурасы 59°С. Жатынның жапқышы қызметін онымен көнелігі бірдей, қалыңдығы 298 м-ге дейінгі сульфаттық-терригендік шөгінділер атқарады.

Құрамы[өңдеу | қайнарын өңдеу]

Фамендік жатын газдарының құрамы мен мөлшері пайызбен: метан -62,2-78,4, этан -1,2-1,76, пропан -0,11-0,12, изобутан - 0,022 т.б. Төменгі Серпухов жатындары газдарының құрамы: метан -75,4-90,0, этан 0,51-2,06, пропан -0,14-0,36, изобутан -0,02 т.б. Фамен горизонттарының хлоридті-натрийлі, хлоркальцийлі суларының минералдылығы 109-415 г/л. Төменгі Серпухов шөгінділерінің хлоридті типті суларының минералдылығы 155-165 г/л. Жатындардың режимі серпінді газ-суарынды. Кен орнын барлау аяқталмаған. [1]

Дереккөздер[өңдеу | қайнарын өңдеу]

  1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1