Радиоэлектронды күрес

Радиоэлектронды күрес — мақсаттары мен міндеттері, орны мен мезгілі өзара байланысты болатын іс-шаралардың және жаудың радиоэлектронды құралдары мен жүйелерін анықтауға, оларды қарудың барлық түрлерін қолдана отырып жоюға немесе басып алуға (істен шығаруға) және радиоэлектронды құралдар арқылы жауды басуға, сондай-ақ өзінің радиоэлектронды жүйесі мен радиоэлектронды құралдарын қорғауға бағытталған әскери әрекеттердің жиынтығы, ұрыс әрекетінің бір түрі.

Радиоэлектронды күресті ұйымдастыру мен жүзеге асыру қарсыластың әскердің басқаруының шырқын бұзу, жаудың барлау ісін жүргізу және олардың әскери техника мен қару қолдану тиімділігін төмендету, сонымен қатар өз әскері мен қарулы күштерін басқарудың беріктігін қамтамасыз ету мақсатында қазіргі әскердің барлығында қарастырылады. Шетелдік көзқарастар бойынша, радиоэлектронды күрес күштерінің басым түсуі — оны олар, кейде "радиоэлектронды соғыс" немесе "эфирде үстемдікке ие болу" деп те атайды — ұрыста және операцияларды орындауда жеңіске жетудің шешуші факторы болуы мүмкін.