Романов Лев Георгиевич

Лев Георгиевич Романов (26.3.1935, Алматы — 7.12. 2002, сонда) — ғалым, техника ғылымының докторы (1972), профессор (1985), Қазақстанның еңбек сіңірген ғылым қайраткері (1992). Қазақ кен-металлургия инcтитутын (1958) бітірген. Алматы механикалық жөндеу зауытында қызметкер (1958 — 59), Металлургия және кен байыту институтында ғылыми қызметкер (1959 — 78), Қазақ политехникалық институтында проректор (1978 — 83), кафедра меңгерушісі (1980 — 97) қызметтерін атқарған. Негізгі ғылыми еңбектері — алюминатты ертінділерді кешенді-полимерлі жүйе ретінде қарастырып, оны ядролық магниттік резонанс тәсілімен алюминий алу мақсатында ыдырату және жетілдіру процесінің физикалық химиясын зерттеуге арналды. Нәтижелері Павлодар алюминий зауытында өндіріске енгізілген. Алюминий шығарудың Байер-күйдіру тәсілінде маңызды рөл атқаратын алюминий, кремний, темір, кальций тотықтары бар кең құрамды гетерогендік жүйелердегі химиялық әрекеттесулерді қарастыра отырып, алюминий ертінділерін тазартудың түрлі жолдарын анықтаған. Алюминатты ерітінділерден ванадий, галлий, хром, титан сияқты металдарды бөліп алу тәсілдерін де зерттеді. 230-дан аса ғылыми еңбектің, 3 монографияның, 68 авторлық куәлік пен патенттің авторы.