Сайқын желі

Сайқын желі, Құбыла желі — жоғарғы қысымды аймақтан соғатын дауылды, суық жел; Сібір антициклонының Алакөл ойысы арқылы солтүстік-батыстан оңтүстік-шығысқа (Жоңғар қақпасын басып Орталық Азияға) қарай өтетін тармағы. Солтүстік-батыс бағыттан соғатын Сайқын желі Алакөл ойысына суық ауа массаларын алып келеді (температура –30— 37С-қа дейін төмендейді). Қатты соққан уақытта (күзде) Алакөл жүйесіне жататын көлдердің (Алакөл, Сасықкөл, Қошқаркөл, Жалаңашкөл) су деңгейі 1 м-ге жуық көтеріледі. Сайқын желі күніне бірнеше рет соғып, кейде 2 — 3 тәулікке созылуы мүмкін. Қыс айларында оңтүстік-шығыс бағыттан өзіне қарсы соғатын жылы Ебі желімен түйісіп, көп жағдайда үстем болады. Топырақ бетіндегі қар жамылғысын ұшырып кетіп, ылғалдылықтың кемуіне себеп болады. Жел ауыл шаpуашылығына, жол қатынасына үлкен зиянын тигізеді.