Салым (ойын)

Салым — көкпар тарту ойынының құрамдас бөлігі. Үш бөліктен құралады. Әр салымға ұтыс ретінде мал немесе ақша тігіледі. Бірінші салымға 2-ден 10-ға дейін уақ мал (қой), екінші салымға қасына бірнеше уақ мал қосқан ірі қара тігеді. Үшінші салымды “өгіз өлді” деп те атайды. Ұтыстың ақшалай түрі сол тігілетін малдың құнына тең болуы тиіс. “Өгіз өлдіге” кілем жауып, жылқы немесе түйе тіккен. Қазіргі уақытта соңғы салымға автокөлік тігіліп жүр. Бұл жағдайда да автокөлікке міндетті түрде кілем жабылады. Алдыңғы екі салым тігілген мал санына қарай үш-төрт рет ойналса, ал үшінші салым бір-ақ рет тартылған. Яғни, бірінші салымды үш-төрт рет, екінші салымды екі-үш қайтара тартады (ойыншылар топқа бөлінбейді). Бұл үш салым бір ғана көкпардың үстінде өтеді және бастан аяқ бір ғана серке тартылады. Салым негізінен той немесе ас беру кезінде өткізіледі. Сондықтан бұл үш салымға тігілетін малды той иесі немесе ас иесі міндетіне алған. Әрине, бұл көп жағдайда көкпар берушінің шама-шарқына байланысты. Бірақ көкпардың бұлжымас ережесін сақтау үшін тігілетін малды той иесінің туған-туысқандары, жора-жолдастары бөліп көтеріскен; қ. Көкпар.