Сардиния корольдігі

Сардиния корольдігі — Савой әулетінің жерлерінің корольдікке айналуынан пайда болған, Австрияға қарсы соғыстар мен Франциямен одақ арқылы Италияны біріктірген мемлекет.

Жалпы мәлімет

Сардиния корольдігі -1720-1861 жылдардағы Италиядағы тарихи мемлекет. Раштадт және Утрехт келісімі нәтижесінде Сардиния аралының Савойя герцогтығына қосылуына байланысты құрылды. ХVIII ғасырдың аяғында революциялық Францияға қарсы соғыста Сардиния корольдігі бірінші антифранцуздық коалицияға(1792) кірді. 1792 жылы француздар Савойя мен Ниццаны басып алды. 1796 жылы Наполеонның Солтүстік Италияға жорығы нәтижесінде Сардиния корольдігі құрамындағы бірқатар стратегиялық маңызды бекіністер Францияға берілді. Напалеон империясы құлағаннан кейін, Вена конгресінің (1814-1815) шешімі бойынша Сардиния корольдігінің бұрынғы шекарасы қалпына келтірілді. ХІХ ғасырдың 40 жылдарында Сардиния корольдігі Италиядағы экономикасы күшті дамыған мемлекеттің бірі болды . Корольдік 1848-1849 жылдардағы Италия революциясы кезінде Италияны біріктіруге тырысқанымен, Кустоцца және Новар шайқасында жеңілгендіктен, өз мақсаттарын уақытша орындай алмады. Рисорджименто (1859-1860) нәтижесінде итальян мемлекеттері мен аймақтары түгел дерлік (Венето мен Лациодан басқа) Сардиния корольдігіне қосылды. 1861 жылы наурызда Сардиния корольдігі ресми түрде Итальян корольдігі болып жарияланды.