Сарыөзек — Қорғас халықаралық автомобиль жолы

“Сарыөзек — Қорғас” халықаралық автомобиль жолы — “Ташкент — Алматы — Қорғас” халықаралық автомобиль жолының бір бөлігі. Алматы облысының оңт.-шығысында орналасқан Сарыөзек, Жаркент арқылы өтіп, Қорғас кентіне дейін созылып жатыр. Бұл жол, сондай-ақ ТМД-ның “Батыс — Шығыс” бағытындағы “Словакия шекарасы — Ужгород — Львов — Тернополь — Хмельницкий — Винница — Умань — Кировград — Днепропетровск — Донецк — Дондағы Ростов — Минеральные Воды — Махачкала — Баку — Түркменбаши — Ашхабад — Мары — Чарджоу — Самарқанд — Джизақ — Ташкент — Шымкент — Тараз — Бішкек — Алматы — Қорғас — Қытай шекарасы” континентаралық автожолының құрамдас бөлігі болып табылады. “Сарыөзек — Қорғас” х. а. ж. туралы алғашқы деректер тех. әдебиетте 1930 ж. келтірілген. Ұлы Жібек жолының бір тармағымен өтетіндіктен, оның халықар. сауда мен тасымал үшін маңызы зор болған. Алғашқы күрделі құрылыс-жөндеу жұмыстары 1934 ж. жүргізілді. Қазір “Сарыөзек — Қорғас” х. а. ж-ның ұзындығы 246 км, 3-тех. санатта, жол жолағының саны — 2. Жолдың 35 — 40%-ы қозғалыс талаптарына сай емес.