Сасықкөл (көл, Жетісу, Абай облыстары)

Сасықкөл
Морфометрия
Өлшемі	49,6 × 19,8 км
Ауданы	736 км²
Көлемі	2,43 км³
Жағалау сызығының ұзындығы	182 км
Тереңдігі	4,7 м
Орташа тереңдігі	3,32 м
Су алабы
Құятын өзендер	Тентек, Қаракөл, Ай
Орналасуы
46°34′21″ с. е. 80°54′55″ ш. б.46.57250° с. е. 80.91528° ш. б. / 46.57250; 80.91528
Ел	Қазақстан
Аймақтар	Жетісу облысы, Абай облысы
Аудандар	Алакөл ауданы, Үржар ауданы
Сасықкөл
Сасықкөл

 Басқа мағыналар үшін Сасықкөл (айрық) деген бетті қараңыз.

Сасықкөл — Алакөл қазаншұңқырының солтүстік-батыс жағында орналасқан көл.

Географиялық орны

Жетісу облысы Алакөл ауданы мен Абай облысы Үржар ауданы жерінде орналасқан көл.

Гидрографикасы

Ауданы 736 км² (аралдарымен қоса есептегенде 747 км²), ұзындығы 49,6 км, ені 19,8 км, жағасының ұзындығы 182 км, орташа тереңдігі 3,32 м (ең терең жері 4,7 м). Суының көлемі 2,43 млрд. м³. Шарасының түбі тегіс, батыстан шығысқа қарай аздап еңкіштеу келеді. Қарашаның аяғында қатып (ақпандағы қалыңдығы 60 — 62 см), сәуірдің бас кезінде мұзы ери бастайды. Көктемде су деңгейі көтерілген кезде Ұялы (Қошқаркөл) көлімен (Алакөл мен Сасықкөл аралығында) жалғасып кетеді. Деңгейінің жылдық ауытқуы 0,65 м.

Жағалау сипаты

Оңтүстік-шығыс бөлігінде Аралтөбе түбегі (абсолютiк биіктігі 117 м), солтүстік-батысында Аралтөбе аралы бар. Көл жағасы аласа, қамыс өскен. Сасықкөлге Тентек, Қарақол, Ай өзендері құяды.

Құрамы

Суының минералдылығы 0,27 г/л — 2,16 г/л, мөлдірлігі 0,2 — 2,6 м. Көл суы химиялық құрамына қарай гидрокарбонатты келеді.

Аң-құстары

Көлде балықтың 8 түрі бар (сазан, көксерке, алабұға, көкбас, т.б.). 1946 жылы мұнда Алакөл мемлекеттік ондатр шаруашылығы құрылып, 1956 жылдан ондатр терісі дайындалды. Көлде үйрек, қаз, бірқазан, аққу, балықшы, шағала, жағалауындағы қамыс арасында қабан, түлкі, мәлін (теңбіл мысық), т.б. мекендейді.