Сергей Михайлович Рубусин

Сергей Михайлович Рубусин(24.1.1924, Ресей, Алтай өлкесі, Барнаул қаласы - 2.2.1945, Польша, Сощинава қаласы) - 2-дүниежүзілік соғысқа қатысушы, қатардағы жауынгер, атқыш,орыс. Семей қаласының металл құю зауытында жұмыс істеген. Кеңес әскері қатарына 1942 жылы қыркүйекте шақырылды. Майданға 1943 жылдың тамыз айында барды. Рубусин Украина майданындағы 13-армия 23-моторлы штурм жасайтын инженер-саперлік бригадасының 47-айрықша батальонында огнеметтен от жаудырғыш болды. Ол Польшаның Штейнау қаласында жаудың тіректі бекінісін жою кезінде өзінің жауынгерлік шеберлігін көрсетті. Автоматпен және гранатамен 20-дан астам гитлершілерді жойып, ұрыс үстінде қаза тапты. Осы ерлігі үшін Рубусинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (10.4.1945). Сондай-ақ ол Ленин орденімен марапатталды. Рубусиннің есімі Барнаул қаласындағы Даңқ мемориалында жазылды.