Су астында құйматастау

Су Aстында Құйматастау – су астында орналасқан құрылыстар мен құрылымдарды құйматастауға байланысты жүргізілетін жұмыстар. Су Асты Құйматастау су астындағы құрылыстар мен құрылымдарды салу, жөндеу және қайта салуда кеңінен қолданылатын тиімді технология болып табылады. Құйматастаудың осы түрінің негізінде үлкен үнемдеулерге қол жеткізуге болады. Атап айтқанда, Су Астында Құйматастау нәтижесінде судың арнасын бұрып, табанын құрғату, құрастырмалы немесе біртұтас су өткізбейтін құрылымдарды қолдану сияқты қосымша шығындарды азайтуға болады. Су астында қуйматастау түрлі жағалаулық құрылыстарды салғанда, бөгендер, мұнай және газ мұнараларын салғанда, қазаншұңқырлар мен құдықтардың, су бассейндерінің табанына су өткізбейтін құйматас қабатын жасағанда қолданылады. 1990 жылы Каспий теңізі деңгейінің көтерілуі себебінен көптеген мұнай ұңғылары су астында қалып қойғандықтан сол ұңғылардың аузын судың бетіне шығару үшін осы су астында құйматастау тәсілі кеңінен пайдаланылды.