Сырым батыр (монография)

≪Сырым батыр≫ орыс тарихшысы М.П.Вяткиннің монографиясы (1947). Автор бұл еңбегінде Сырым Датұлы бастаған Кіші жүз халқының ұлт-азаттық көтерілісіне жан-жақты талдау жасайды. Вяткин патшалық Ресейдің отарлау саясатына қарсы халықтық қозғалысты үш кезеңге бөледі. 18 ғасырда болған осынау қайғылы да қаһармандық уақиғалар кезеңін, тарихи дамудың осынау ұзақ жолын, Сырым батырдың басынан кешкен шым-шытырық алдамшы сәттерді дәйекті түрде талдайды. Автор Сырым батырдың өжеттігіне, алғырлығына, батырлығына, оның халқына деген асқан сүйіспеншілігіне, ел азаттығы үшін жан аямаған күрескер екендігіне жоғары баға береді. Осы еңбегі үшін 1948 ж. оған КСРО Мемлекеттік сыйлығы берілді.