Сүйек тақташалары

Сүйек тақташалары (костные пластинки) (lamina ossea, лат. lamina — тақташа, os — сүйек) — сүйек ұлпасының жасушааралық заты. Сүйек такташаларының орташа қалындығы 4-15 мкм тең. Оның органикалық құрамын коллаген талшықтарының ерікше түрі — оссеин талшықтары мен оларды желімдеуші мукопротеид (оссемукоид), ал минералды құрамын кальций және фосфор тұздары түзеді.

Сүйек тақташалары бір бағытта қабаттаса орналасып, пішіні әр түрлі сүйек тақташаларының жүйелерін жасайды. Жілік қабырғасындағы тығыз сүйек затының құрылымдық бірлігі — пішіні дөңгелек не сопақ келген тақташалар жүйелері — остеондар. Олардың ішіндегі остеондар өзектері арқылы сүйекті қоректендіретін қан тамырлары өтеді. Остиондар аралығында сүйек тақташаларының аралық жүйесі орналасқан. Жіліктің тыгыз сүйек қабырғасын сыртқы және ішкі сүйек тақташаларының жалпы жүйелері қаптап жатады.