Терең бұрғылау нысандарын анықтау

Терең бұрғылау нысандарын анықтау. Мұнай мен газ кенорындарын іздеу сатысына тиесілі геологиялық барлау жұмыстарын ең алғаш бастау шараларының бірі. Зерттеу нысаны мұнай немесе газ кіріктіру мүмкіндігі анықталған немесе осы мүмкіндік жоққа шығарылмайтын аудандар болып табылады. Бұл шаралардың басты-басты мақсат-мүдделері төмендегідей: мұнайлы және мұнайды кіріктіруі мүмкін кешендердің жер қойнауында орналасу жағдайларын және өзге де геологиялық-геофизикалық қасиеттерін зерттеу; аталған кешендердегі мұнай мен газ кіріктіруге қабілетті тұтқыштарды, немесе "жатын " типтес қалыпсыздықтарды анықтау; анықталған тұтқыштардағы мұнай (газ) ресурстарын С, категориясы, ішінара С2 категориясы бойынша сандық тұрғыдан бағалау; іздеу бұрғылауын жүргізетін нысандарды таңдап алу және оларды іске қосудың ретін анықтау. Аталған мақсат-мүдделерді жүзеге асыру үшін жүргізілетін жұмыстар кешені төмендегідей: жергілікті және тыңғылықты деңгейлерге сәйкес келетін ғарыштық бейнетүсіру және әуебейнетүсіру материалдарын бажайлау; 1:100000 және 1:50000 масштабтардағы құрылымдық-геологиялық және құрылымдық-геоморфологиялық түсірімдерді жүзеге асыру; көрсетілген масштабтарға сәйкесті сейсмикалық, гравитациялық, магниттік және электрлік барлаулардың түрлі-түрлі әдістерін қолдану; геологиялық қиманы болжау және "жатын" типтес қалыпсыздықтарды болжау мақсатында арнаулы жұмыстар мен зерттеулер жүргізу.Терең бұрғылау нысандарын анықтау жұмыстары болашағы бар деп табылған нысандарды мұнай мен газ кенорындарын іздеу шаралары міндетгі түрде жүзеге асырылатын тектоникалық құрылымдар тізбегіне кіргізумен тамамдалады.