Ушаков медалі (КСРО)

Ушаков медалі
Шынайы атауы	орыс. Медаль Ушакова
Мемлекет	КСРО
Жағдайы	берілмейді
Негізделді	3 наурыз 1944 жылы
Барынша ұсынылған	16 080
Жоғары марапаты	«Ерлігі үшін» медалі
Төменгі марапаты	«Жауынгерлік еңбегі үшін» медалі
Medal of Ushakov Ортаққорда

Ушаков медалі (орыс. Медаль Ушакова) — КСРО мемлекеттік марапаты. КСРО Жоғарғы Кеңесі Төралқасының 1944 жылғы 3 наурыздағы «Әскери медалдарды: Ушаков медалі мен Нахимов медалін тағайындау туралы» Жарлығымен тағайындалды.

Медаль сәулетші М. А. Шепилевскийдің жобасы бойынша жасалған.

Медал жайлы ереже

Ушаков медалімен Әскери-теңіз флоты мен шекара әскерлерінің теңіз бөлімдеріндегі матростар мен сарбаздар, старшиналар мен сержанттар, мичмандар мен прапорщиктер соғыс кезінде де, бейбіт уақытта да теңіз ұрыс қимылдары театрларында социалистік Отанды қорғау кезінде көрсеткен батылдығы мен ерлігі үшін марапатталды.

Ушаков медалімен төмендегі жағдайларда көрсетілген жеке батылдығы мен ерлігі үшін марапаттау өткізілді:

социалистік Отанның жауларымен теңіз ұрыс қимылдары театрларындағы шайқастарда;
КСРО-ның мемлекеттік теңіз шекарасын қорғау кезінде;
Әскери-теңіз флотының және шекара әскерлері бөлімдері мен кемелерінің жауынгерлік тапсырмаларын орындау кезінде;
өмірге қауіп төндіретін жағдайларда әскери борышын атқару кезінде.

Ушаков медалі кеуденің сол жағына тағылып, КСРО-ның басқа медальдары болған жағдайда «Ерлігі үшін» медалінен кейін орналасады.

Медалдің сипаттамасы

Ушаков медалі 925 сынамалы күмістен дайындалды. Медаль диаметрі 36 мм болатын, шығыңқы ернеуі бар дұрыс дөңгелек пішінге ие. Оның ортасында шеңбер бойымен шығыңқы нүктелермен қоршалған Ф. Ф. Ушаковтың кеудеге дейінгі бедерлі бейнесі орналасқан. Жоғарғы бөлігінде шеңбер бойымен шығыңқы әріптермен «Адмирал Ушаков» деген жазу бейнеленген. Төменгі бөлігінде, Ушаковтың бедерлі бейнесінің астында, айқастырылған таспамен біріктірілген екі дәмжапырақ бұтағы орналасқан. Медалдің дөңгелек бөлігі зәкірдің үстіне орналастырылған. Медалдің артқы жағына реттік нөмірі соғылған.

Медал құлақша мен шығыршық арқылы шетінде ақ және көк жолақтары бар көгілдір түсті қатқыл жібек таспамен тысталған бесбұрышты тағанға жалғанады. Таспаның ені — 24 мм, ақ жолақтың ені — 2 мм, көк жолақтың ені — 1,5 мм. Таспаның үстінен тағанның жоғарғы бұрыштарынан медалдің құлақшасына дейін зәкір тізбегі бекітілген.

Ұлы Отан соғысы жылдары Ушаков медалімен шамамен 14 мың әскери теңізші марапатталды.

1980 жылы 28 наурызда медал туралы ереженің жаңа редакциясы қабылданды. Соған сәйкес 1980–1991 жылдар аралығында Ушаков медалімен шамамен 1000 адам марапатталды.

1995 жылғы жағдай бойынша, Ушаков медалімен барлығы 16 080 адам марапатталған^[1].

Әдебиет

Кавалеры медали Ушакова. — СПб: Центральный военно-морской архив, издательство «Аграф+», 2011. — 455 б. — Таралымы 350 дана.
Изотова М. А., Царёва Т. Б. Ордена и медали России и СССР — Ростов-на-Дону: ООО ИД «Валдис», 2010. — Б. 624—625. — ISBN 978-5-9567-0960-3
Володин А. Н., Мерлай Н. М. Медали СССР — СПб.: Печатный двор, 1997. — Б. 122—123. — ISBN 5-7062-0111-0
Колесников Г. А., Рожков А. М. Ордена и медали СССР — Минск: Народная асвета, 1986. — Б. 87

Дереккөздер

↑ Санько В.В. Ордена и медали СССР АСТ, 2014. — 350 б. — ISBN 978-985-13-2468-8

[1] Санько В.В. Ордена и медали СССР АСТ, 2014. — 350 б. — ISBN 978-985-13-2468-8

[1]