Фаинтина Ивановна Овчиникова

Овчиникова Фаинтина Ивановна – 1939 жылы 12-ақпанда Шығыс Қазақстан облысындағы Васильевка ауылында туған.

1946-1956 жылдары Алматы қаласындағы №44 орта мектепті тәмамдаған. ДОСААФ арнайы курсын бітерген соң 1957-1960 жылдары Алматы қаласындағы №227 Әуежайы отрядында радиооператор болып қызмет істейді.

1969-1971 жылдары Ленинград баспа-полиграфия техникумын тәмамдайды. Он екі жылдай Бішкектегі «Мектеп» баспасында техникалық редактор болған ол, 1984 жылдан бастап Жедел басып шығару баспаханасында әуелі терім цехының мастері, сосын аға инженер-технолог қызметін атқарды.

Ф.И. Овчиникова 1991 жылдан бері «Санат» баспасында техникалық редактор. Оның редакциялауымен шыққан «Жыр – дария», «Қазақстан тарихы: зерттеулерде, құжаттарда» серияларымен шыққан кітаптар Қазақстан Республикасы Мәдениет, ақпарат және спорт министрлігінің бірінші дәрежелі дипломдарымен марапатталды.

2005 жылы жарық көрген Ұлы Отан соғысы Жеңістің 60 жылдығына байланысты шығарылған Б. Момышұлының «Ұшқан ұя", Халық қаһарманы Қ. Қайсеновтың «Жау тылында", Б. Бұлқышевтің «Адамзатқа хат", Қазақстанның халық жазушысы М. Әлімбаевтің «Хат", халықаралық «Алаш» сыйлығының иегері Қ. Исабаевтың «Алғы шепте» және басқа да майдангер ақын-жазушыларымыздың кітаптары көркемдік сапасымен ғана емес, сонымен бірге ішкі-сыртқы дизайнімен де оқырман назарын өзіне бірден аударады. Бұл орайда техникалық редактор Фаинтина Ивановна Овчиникованың қосқан үлесі ерекше.