Хаапсалу теміржол вокзалы

Хаапсалу теміржол вокзалы (эст. Haapsalu jaamahoone) — 1904 жылдан 2004 жылға дейін Хаапсалудағы (Эстония) негізгі теміржол вокзалы қызметін атқарған тарихи құрылыс кешені. Вокзал ғимараты 1998 жылы 30 наурызда мәдени мұра мәртебесін алды.^[1]

Тарихы

Хаапсалу темір жол вокзалының тарихы 1906-1907 жылдары қалаға теміржол салынған кезде басталды. Мұндағы шипажай Ресей императоры Николай II-нің отбасымен және сарай қызметкерлерімен бірге баратын сүйікті орны болды. Оларға ыңғайлы болу үшін күту павильоны мен жабық платформа салынды. Платформаның ұзындығы 216 метрді құрайды. Бұл сол кездегі пойыздың ұзындығымен бірдей болды. Платформаның төбесі корольдік отбасы мүшелерінің жаңбырда суланбауы үшін салынған.

Кеңес Одағы кезінде Хаапсалуға Таллиннен дизельдік пойыздар күн сайын келетін. Бірақ Эстония өз тәуелсіздігін алғаннан кейін жолаушылар ағыны айтарлықтай қысқарды. 90-жылдардың басында шипажайдың танымалдылығы төмендеп, үкімет мұнда пойыздарды жүргізу экономикалық тұрғыдан мүмкін емес деп шешті.

Хаапсалумен теміржол қатынасы 1995 жылы тоқтатылды. Соңғы дизельдік пойыз 21 қыркүйекте Таллиннің Балтық станциясынан аттанды, ал жүк пойыздары 2004 жылға дейін келді. ХХІ ғасырдың басында курорттық қалаға салынған рельстер бөлшектеліп, оның орнына велосипед жолын салды.^[2]

Архитектурасы

Хаапсалу вокзалының ғимараты теміржол вокзалынан, император павильонынан және арка терезелері бар галереямен байланыстырылған үлкен ғимараттан тұратын көп бөлімді құрылыс кешені. Бүкіл ансамбль толығымен шатырмен жабылған 216 метрлік платформа арқылы функционалды тұтас қосылған.

Бір қабатты жолаушылар залының орталық бөлігі арамен ойылған ағаш шілтермен безендірілген, тас қабырғалармен қоршалған екі қабатты күту залы орналасқан. Кірпіштен жасалған негізгі корпустың көрнекілігі неоренессанс стиліндегі қоңыраумен, сондай-ақ төбесінде және мұнараның жоғарғы жағында сымнан соғылған торлармен ерекшеленеді.

Күту залының солтүстік-шығыс басты қасбеті қоңырау мұнарасымен безендірілген. Жолаушылар залының оңтүстік-шығыс жағындағы шағын күту залы төбедегі шаммен жарықтандырылған. Жолаушылар залының интерьерінде түрлі-түсті керамикалық плиткалардан жасалған сылақ төбелер мен едендер бар. Күту залындағы жарық шамының астындағы төбе суреті 1950 жылдары боялған теңіз көріністерімен безендірілген. Перронның оңтүстік-шығыс бөлігінің шетінде теміржол вокзалының жүк қоймасы орналасқан.