Химиялық машина жасау

Химиялық машина жасау — машина жасаудың химия өндірісі үшін технологиялық жабдықтар, сондай-ақ жиынтық технологиялық желілер мен қондырғылар дайындайтын саласы. Химиялық машина жасаудың негізгі бұйымдары: жылу масса алмастырғыш, реакциялаушы, кептіргіш аппаратура, сұйық біртекті емес системаларды айыру жабдықтары, химиялық өнімдерді араластыру және топтау, газ қоспаларын айыру, резина қоспалар мен пластикалық массаларды өңдейтін машиналар мен технологиялық желілер. Химиялық машина жасау кәсіпорындары шығаратын химиялық аппаратура өзінің техникалық-экономикалық сипаттамасы, түрлерінің саны және үлгілік көлемі жағынан негізінен осы заманғы техникалық дәрежеге сай келеді. Химия өнеркәсібінің ерекшеліктеріне, әсіресе химиялық процестердің көптігіне, химия өндірісін үздіксіз жетілдіруге, қысым мен температураны көптеп қолдануға байланысты Химиялық машина жасау жабдықтың жекеленген түрінің мыңдаған үлгісін, көлемін, яғни бір бұйымның бірнеше номенклатурасын дайындап шығарады. Химиялық жабдықтарды бірыңғайлау мен стандарттау барынша дамытылып келеді. Мұның өзі химиялық машиналар мен аппараттарды көптеп шығарудың, олардың сериялылығын арттырудың және сапасын жақсартудың маңызды кепілі болып табылады. Химиялық машина жасауды дамыту қарқынын арттыру үшін мамандандырылған кәсіпорындардың қуатын арттыру, жаңа зауыттар салу, өндірістің озат технологиясын енгізу, бұйымдық және технологиялық мамандандыруды жүзеге асыру, бірыңғайлау және бір ізге келтіру негізін одан әрі дамыту қажет.