Шахта көлігі

Уикипедия — ашық энциклопедиясынан алынған мәлімет
Навигацияға өту Іздеуге өту

Шахта көлігі - шахтаның жұмысшыларды, қазылып алынған кенді және басқа заттарды (бекітпе, қопарғыш заттар, құрал-жабдықтар, машиналар, т.б.) тасымалдауға арналған. Оның жер асты және жер үсті түрлері бар. Шахтаның жер асты көлігі қазылып алынған кенді забой арқылы штрекке жеткізеді. Содан кейін пайдалы қазынды скип көмегімен шахта оқпаны арқылы жер бетіне шығарылады. Шахта көлігінің жер үсті түрі шығарылған кенді байыту фабрикасына, металлургиялық зауытқа, темір жол станциясына тасымалдайды. Шахта көлігінің үздіксіз және үздікті әрекетті түрлері бар. Оның үздіксіз әрекетті түріне конвейер, гидрокөлік, пневмокөлік, т.б. жатады. Ал үздікті әрекетті Шахта көліші релісті және реліссіз болып ажыратылады. Мұның алғашқы түріне темір жолмен қозғалатын локомотив, электровоз, болат арқанмен сүйретілетін вагонетка, т.б. жатады. Релісті Шахта көлігінде тар табанды (ені 600, 700, 750, 900 мм) т. ж. пайдаланылады. Реліссіз Шахта көлігіне дизеловоз, электр машинасы, т.б. жатады. Шахта көлігі оқпан маңындағы қазбалармен тығыз байланыста болады. Бұл қазбалар арқылы кенмен толтырылған вагонеткалар кен көтергіш оқпанға жіберіледі, ал бос вагонеткалар забойға қайтарылып отырылады.

Сілтемелер[өңдеу | қайнарын өңдеу]

  • Қазақ Энциклопедиясы, 9 том.