Шымкент қалалық опера және балет театры

Шымкент қалалық опера және балет театры
Орналасуы	Қазақстан Шымкент
Негізделгені	2008
Директоры	Майра Мұхамедқызы

Шымкент қалалық опера және балет театры (2021-жылға дейін Оңтүстік Қазақстан облыстық опера және балет театры) – 2007 жылы 3 сәуірде құрылған театр, шымылдығы 2008 жылы 7 қарашада "Інжу-Маржан" қойылымымен ашылды.

Тарихы

"Оңтүстік Қазақстан облыстық опера және балет театрының" ресми түрде ашылу салтанатында "Ұлы музыка әлемі", итальяндық дирижер И. Кайаццоның "Браво, Бельканто!", Омбретта Маккидің жеке концерттері өтіп, Оңтүстік Қазақстан облысындағы жаңа рухани өнер ошағы пайда болғанын паш етті. 2008–2009 жылдары шымкенттіктердің классикалық музыканы келешек опера театрының сахнасында қабылдауына жасалған әзірлік іспетті "Әлем операсының жұлдыздары Шымкентте" деп аталатын халықаралық фестиваль өткізілді.

Белгілі қазақстандық композиторлардың операларынан алынған алғашқы "Інжу-маржан" қойылымы (2008) мен алғашқы опера Дж. Веридің "Травитасы" театрдың тұңғыш директоры Асқар Әлихан жетекшілігімен жүзеге асты.

2021 жылы "Шымкент қалалық опера және балет театры" деп аталды.

Әр жылдардағы театр директорлары: Асқар Әлихан, Б. Рахманов, Ә. Нұрмағанбетов (2017-2020), М. Мұхамедқызы (2021 жылдан).

Репертуары

Дж. Верди "Травиата", "Риголетто", Р. Леонкавалло "Паяцы", А. Жұбанов, Л. Хамиди "Абай", Е. Брусиловский "Қыз Жібек", С. Мұхамеджанов "Айсұлу", Е. Рахмадиев "Қамар Сұлу". Қазақ операларынан үзінділер жиынтығы "Інжу-Маржан", П. Чайковский "Евгений Онегин", С. Рахманинов "Алеко", У. Гаджибеков "Аршын мал алан", Г. Доницетти "Махаббат шырыны", М. Төлебаев "Біржан–Сара»", П. Масканьи "Сельская честь", С. Ахметова, Р. Шынықұлов "Махаббат мұнарасы", Дж. Россини "Севильдік шаштараз", И. Морозов "Доктор Айболит", Р. Салаватов "Қарлы ханым", П.И. Чайковский "Щелкунчик".

Жетістіктері

Театр солистері өз елімізде ғана емес, шетелдерде де түрлі табыстарға қол жеткізуде.

• Театр солисі Ж. Белгібаева 2009 жылы Ташкентте өткен Н. Ахмедиев атындағы вокалистердің халықаралық конкурсында екінші орын алды, 2011 жылы Қазақстан театр қайраткерлері одағының "Үміт" номинациясы бойынша "Еңлікгүл" сыйлығына ие болды.
• "Қазақ Романсиадасы" халықаралық конкурсында театр солистері Е. Жандарбай, А. Мазкенова, А. Скибин бірінші және екінші орындарға ие болса, М. Кин "Романсиада маэстросы" номинациясын жеңіп алды.
• Театр солисі Н. Жүсіпбеков Ш. Қалдаяқов атындағы халықаралық конкурстың Гран-приімен марапатталды.
• Е. Жандарбай мен М Кин Польшада өткен "Музыкальный сад Рюбецаля" халықаралық фестиваліне қатысып, бірінші және екінші орындарды жеңіп алды.
• 2011 жылы театр ұжымы алғаш рет республикалық "Театр көктемі – 2011" фестиваліне қатысып, "Алеко" операсының қойылымы үшін "Театр дебюті" номинациясына лайықты саналды. Осы жылы Астанада өткен Оңтүстік Қазақстан облысының күндеріне қатысты. Симфониялық оркестр, хор мен солистер Бейбітшілік сарайында өткен үкімет концертінің біріккен бағдарламасы бойынша сахнаға шықты.

Театр ғимараты 1984 жылы салынған, 2007 жылы театрға бейімделіп қайта қалпына келтірілді. Мекеме ішінде 300 көрерменге арналған үлкен зал мен 86 орындық кіші зал бар.