Шымкент қалалық қуыршақ және жасөспірімдер театры

Уикипедия — ашық энциклопедиясынан алынған мәлімет
Навигацияға өту Іздеуге өту
Шымкент қалалық қуыршақ және жасөспірімдер театры
сурет
Орналасуы  Қазақстан
Шымкент
Негізделгені 1983
Директоры Бахтияр Спанов
Көркемдік жетекшісі Антонина Малюченко

Шымкент қалалық қуыршақ және жасөспірімдер театры (2018 жылға дейін "Оңтүстік Қазақстан облыстық қуыршақ театры" деп аталды) – балалар мен жас көрермендерге арналған мәдени-сахналық ұжым.

Тарихы

Оңтүстік Қазақстан облыстық қуыршақ театры 1983 жылдың жазында, сол кездегі облыстық партия комитетінің бірінші хатшысы Асанбай Асқаровтың қолдауымен ашылды. Театр бастауында директор Николай Мустакиди, бас режиссер Бекболат Парманов және бас суретші Маяра Дәуренбаева тұрды. Олардың шақыруы бойынша Алматы мен Ленинград қалаларынан театр, музыка және кино институттарының түлектері келді. Алғашқы театр маусымы 1984 жылы Г. Ландаудың "Ку-ка-ре-ку!" спектаклімен ашылды. Оның ізімен Н. Гернеттің "Гусенок", "Волшебная лампа Алладина", Н. Оспановтың "Мұңлық–Зарлық" спектакльдері пайда болды. Осы қойылымдарын театр ұжымы Ташкент, Чкаловск, Ленинабад қалаларына барған гастрольдік сапарларында көрермендерге ұсынды.

Театр тарихында директорсыз, көркемдік жетекшіcіз қалған кездер де кездесті. Осындай нарық жағдайында Валентин Малюченко жұмысты әрі қарай жалғастырып әкетті. Бас режиссерлікке тағайындалған Тастан Өтебаевтың қойылымдары әлі күнге дейін көрермендердің қызығушылығын туғызып келеді. Режиссерлік дарынымен қатар ол орыс тілінен қазақ тіліне тікелей тәржімалайтын қырынан танылды. Осы кезеңнен бастап барлық спектакльдер екі тілде қойылды. Жамбыл, Қарағанды, Шымкент, Жетісайда бас режиссер болып қызмет еткен Қазақстанның еңбек сіңірген мәдениет қызметкері Әскер Құлданов та бұл театрға елеулі еңбек сіңірді. Қазақстанның мәдениет қайраткері, бас суретші Маяра Дәуренбекованың баға жетпес үлесі қазақ халқының аңыз, ертегі, эпостары негізінде жазылған "Мұңлық-Зарлық", "Ақ құс туралы аңыз", "Киелі алма", "Гусенок", "Волшебная лампа Алладина", "Бычок – острые рожки" және тағы да басқа қырыққа жуық спектакльдерден көрініс тапты. "Теремок", "Хозяин леса", "Добрый гусь", "Хочу быть большим", "Волшебная свирель", "Аленький цветочек" және тағы да басқа ондаған қойылымдарымен театр репертуарын ұлғайтқан театрдың суретші-қоюшысы Ольга Кравченко көптеген жылдар бойы жемісті еңбек етіп келді. Бүгінде театр репертуарындағы жетпістен астам спектакльдері Тараз, Астана, Байқоңыр қалаларына шыққан гастрольдік сапарлары барысында көрсетіліп келеді. Сонымен қатар театр аудандарға барып, балалар үйлерінің жеткіншектерін қайырымдылық спектакльдерімен қуантып жүр.[1]

Театр жетістіктері

  • 1991 жылы Болгарияның Варна қаласында өткен фестивальде Р. Москованың "Когда цветут маргаритки" спектаклі "Алтын дельфин" сыйлығымен марапатталды.
  • 1993 жылы Түркияда өткен қуыршақ театрларының халықаралық фестивалінде Н. Оразалиннің "Ақ құс туралы аңыз" спектакліне Гран-при табысталды.
  • 2002 жылы Алматыда өткен республикалық фестивальде театрдың екі труппасы да – қазақ труппасы А. Қадыровтың "Шопандар патшасы" қойылымы үшін, орыс труппасы Т. Өтебаевтың "Пушкин ертегілерінің әлемі" спектаклі үшін жүлделі орынға ие болды.
  • 2004 жылы Ақтөбе қаласының "Алақай" қуыршақ театрында Қазақстандағы Ресей жылына байланысты фестивальде "Мұңлық-Зарлық" қойылымымен қатысып, сыншылардың оң бағасын иеленді.
  • 2005 жылдың қазан айында Түркияның Измир қаласында өткен "Көлеңкелі және қуыршақ театрлары" халықаралық фестиваліне де "Мұңлық-Зарлық" атты қойылыммен қатысып, диплом және қаржылай сыйақымен марапатталды.
  • 2006 жылы өнер ордасы Шымкент қаласындағы "Көктем – театр – сахна – 2006" фестивалінде "Ақ құс туралы аңыз" туындысын сахналап, бас жүлдені жеңіп алды.
  • 2013 жылдың қыркүйек айында Алматы қаласындағы ІІІ дүниежүзілік қуыршақтар карнавалына орыс труппасы "Қаңбақ шал" атты музыкалық қойылыммен қатысты.

Басшылық

2007 жылы театрдың директоры болып Марта Ташенова тағайындалды. 2010 жылдан бастап театрдың көркемдік жетекшісі осы театр қабырғасында құрылғалы бері жұмыс істеп келе жатқан – Антонина Малюченко. Темірбек Жүргенов атындағы Қазақ ұлттық өнер академиясын бітірген ол "Колосок", "Маша и три медведя" спектакльдері мен "Колобок", "Королевская история" , "Концерт для Цокотухи", "Лесная сказочка" мюзиклдерін қойды. Театр ұжымы облыстық және қалалық мәдени шараларға ұдайы қатысып, тұрақты түрде қайырымдылық спектакльдерін қойып тұрады.

2014 жылдың мамыр айынан бастап театрдың директорлық қызметін Бахтияр Спанов жалғастырды. Осы жылы жылдың қорытындысы бойынша ұжым облыстағы "Жылдың ең үздік мәдениет және өнер мекемесі" номинациясын иеленді.

Галерея

Дереккөздер

  1. Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9

Театр сайты

http://www.shymteatr-kuz.kz/