Шыны талшық

Шыны талшық – балқытылған шыныны созу арқылы алынатын жасанды жіп. Шыны талшықты жасағанда шынымассаны балқытқыш пеште балқытып, балқыманы фильер арқылы өткізеді. Оның диаметрі 3 – 100 мкм, ұзындығы 20 км-ден аса (үздіксіз шыны талшық) немесе диаметрі 0,1 – 20 мкм және ұзындығы 1 – 50 см (штапельді шыны талшық) болады. Сыртқы пішіні жағынан үздіксіз шыны талшық табиғи немесе жасанды жібекке, ал штапельді шыны талшық мақта немесе жүннің қысқа жіптеріне ұқсас болып келеді. Үздіксіз шыны талшық балқытылған шыныны саңылау саны 200 – 2000 болатын фильерлерден өткізіп, созу арқылы алынып, талшық білікке оралады. Талшықтың диаметрі созу жылдамдығы мен фильерлердің диаметріне байланысты. Технологиялық процесс бір немесе екі сатыда жүзеге асады. Бірінші сатыда шыны талшық тікелей шыны балқытатын пештен созылса, ал екінші сатысында шыны сынықтары пайдаланылады. Штапельді шыны талшықты алу кезінде балқыған шыны ағынына бу, ауа немесе ыстық газдар жіберіледі. Шыны талшықтың қасиеттері олардың химиялық құрамымен тығыз байланысты. Олардың химиялық заттар әсеріне тұрақты және ыстыққа төзімді (1000С), диэлектрлік қасиеті жоғары, мех. берік (300 – 500 кгс/мм2), жылу өткізгіштігі төмен. Шыны талшық ширатылған, өрілген жіптер түрінде шығарылады, сондай-ақ шыны пластиктер жасауда нығайтушы материал және электртех. өнеркәсіпте электр оқшаулағыш бұйымдар дайындауда, тағы басқа қолданылады.

Сілтемелер

Қазақ энциклопедиясы, 9т.