Жамбыл атындағы Шығыс Қазақстандық драма театры (Өскемен)

Уикипедия — ашық энциклопедиясынан алынған мәлімет
Jump to navigation Jump to search

Жамбыл атындағы Шығыс Қазақстандық драма театрыӨскемен қаласындағы мәдени-шығармашылық өнер ұжымы. 1936 ж. қалалық драма театры ретінде құрылған. Сол жылы қаңтарда А.Н. Афиногеновтің “Қиырда” пьесасымен тұңғыш рет театр шымылдығы ашылды. Алғашқыда театр труппасын режиссер Ю.А. Левандовский басқарды. 1939 жылы облысы театрға айналып, оған Жамбыл есімі берілді. Алғашқы жылдары театр труппасы орыс және украин жазушыларының (Н.В. Гоголь, К.А. Тренев, А.Е. Корнейчук) пьесаларын қойды. Екінші дүниежүзілік соғыс жылдары патриоттық-ерлік тақырыбына жазылған (К.М. Симонов, Л.М. Леонов, В.В. Вишневский, т.б. қаламгерлердің) драмалық шығармалар сахнаға шығарылды. Соғыстан кейінгі жылдары да осы тақырыпқа бірқатар спектакльдер қойылып, ол одан әрі өзінің даму өрісін тапты. 1957 жылы театр ұжымы Алматы қаласында өткен республикалық театрлар байқауында Л.Н. Толстойдың “Анна Каренина” спектаклі үшін 1-дәрежелі дипломға ие болды. 20 ғасырдың 70 – 90-жылдары театр репертуарынан орыс (А.П. Чехов, А.С. Пушкин, А.Н. Островский, В.Н. Билль-Белоцер-ковский, Симонов, Розов, И.М. Дворецкий, А.В. Вампилов, Л.С. Разумовская, В.Н. Шапошников), беларусь (А.А. Дударев, А.Е. Макаенок), татар (Т.А. Минуллин), башқұрт (М.С. Кәрім), қырғыз (Ш.Т. Айтматов), қазақ (І.Мұқашев, Д.Исабеков) және шет ел (Б.Брехт, У.Гибсон) жазушыларының драмалық шығармалары да орын алды. Театр ұжымы балалар мен жасөспірімдерге арналған 20 ғасырға тарта спектакльді сахнаға шығарды (2000). Театр құрамында қазақ труппасы және балалардың “Гусенок” қуыршақ театрының труппасы жұмыс істейді. 1986 жылы театр ұжымы Қазақ КСР-і Жоғарғы Кеңесінің Құрмет грамотасымен марапатталды.[1][2]

Дереккөздер[өңдеу]

  1. “Қазақстан”: Ұлттық энциклопедия/Бас редактор Ә. Нысанбаев – Алматы “Қазақ энциклопедиясы” Бас редакциясы, 1998 ISBN 5-89800-123-9
  2. Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8