Шыңыраубай Тасин

Шыңыраубай Тасин (1903, Аққолқа болысы, Доңызтау – 1987, Ақтөбе облысы) – халық шаруашылығының шебері, шопан.

Кеңес үкіметінің саясатына қарсы болып, көп жыл бойы Ұлы Отан соғысына барудан бас тартқан. Кейін Нөкіс қаласында тұтқындалып, 1953 жылы ақталып шыққан. Ақталғаннан кейін «Жамбыл» колхозында ұзақ жыл бойы мал бағып қажырлы еңбек еткен. Еңбегі еленіп «Құрмет белгісі» орденімен, халық шаруашылық көрмесінің алтын, күміс медальдарымен марапатталған.

Соғыс кезінде ізіне бір топ ауылдастарын ертіп Доңызтаудың Шағырай тауы үстіндегі жерлерді паналап өмір сүрген Шыңыраубай туралы аңыз әңгімелер көп. Өзі шебер етікші болған адам. Етіктің өкшесін алмалы-салмалы етіп жасап алып, із кесушілерді талай жаңылыстырған. Жер жағдайын, ауа райының, алдағы кезеңдерін де болжай білген. Қайратты, жүректі, батыл тез шешім қабылдай білетін ерекшеліктері болған.

Қарақалпақстанда қолға түскеннен кейін де барлық кінәні өзі мойнына алып, жолдастарын сатпай білместікпен, сауатсыздықтан қателескендігін мойындаған.

Ақталып шыққаннан кейін елдің шаруасына – Жамбыл колхозы мен Оймауыт совхозының мал шаруашылығын өркендетуге адал тер төккен шопан болды.