Шұғыл бүркеніш

Шұғыл бүркеніш (орыс. Оперативная маскировка) — әскердің алда тұрған қимылы, операция мақсаты, аумағы, уақыты мен қарудың жаңа түрлерін қолдану сипатына қатысты қарсыласты жаңылыстыру мақсатында жүргізілетін әр түрлі шаралар жиынтығы. Шұғыл бүркеніш — оперативті түрде тұтқиылдан табысқа жетудің негізгі амалдарының бірі. Шұғыл бүркеніш жасау жолдарына қарсыласқа жалған ақпарат беру, бүркемелеудің әр түрлі техникалық құралдарын кеңінен қолдану, түнгі уақыт пен жергілікті жер жағдайы, әскери құпия мен әскерді жасырын басқаруды сақтау туралы шаралар өткізу жатады. Шұғыл бүркеніш жасауда мақсатқа жету жолдары: нақты жағдайға байланысты жоспар құру, белгіленген шараларды дер кезінде әрі дәл орындау, әскердің бүркемелеу шараларына және жерде, әуеде өткізілген шараларына үздіксіз бақылау жасау. Шұғыл бүркеніш шараларын өткізуге құрлықтағы әскер, әскери-әуе күштері, әуе шабуылына қарсы қорғаныс әскері, әуе-десант әскері бөлімдері мен құрамалары қатысады.