Шұқшию

Шұқшию. Бір нәрсеге зер салып үңілу, қадағалап ден қоюды осы сөзбен де береміз. «Менің бұдан былайғы шұқшиятыным орыс тілі мен орысша оқу болады» (Сәбит Мұқанұлы Мұқанов, Өмір мектебі.). Әдетте, бір нәрсеге зер сала қарау дегеніміз көбіне ойлана қараумен мағыналас болып отырады. Осымен «шуқши» етістігіне төркін боларлық тұлғаны көне тілдердің бірі — чуваш тілінен табамыз. Чуваштарда «шухааш», кейде «шухши» сөздері қазақ тіліндегі «ой» (ойлау) орнына қолданылады, осыған қарағанда, «ой», орнына жүретін «шүх» түбірлес сөз ертеректе біздің тілімізде де болып, кейін қолданудан қалып, тек «шұқши» етістігінде сақталған демекпіз. Сонда «шүқшию»— қазіргі кездегі «ойлану»-дың баламасы.