Яков Степанович Котельников

Яков Степанович Котельников(25.9.1922, Шығыс Қазақстан облысы,Зырянов ауданы,Никольское селосы - 5.11.1972, Алматы қаласы) - 2-дүниежүзілік соғысқа қатысушы, гвардия сержанты, батарея командирі. Соғысқа дейін ұжымшарда жұмыс істеді. 1942 жылы күзде Кеңес әскері қатарына шақырылса, Сталинград түбінде алғаш рет ұрысқа кірді. 1943 жылдың жазында Орел - Курск доғасында Генераловка - Гремячий бағытында гитлершілердің тегеурініне табандылықпен қарсы тұрды. Тек 8 шілде күні жаудың 32 танкісі қиратылды. Котельниковтің зеңбірегі тұрған телімде 24 жауынгер жаудың үш ротасын жойды. 1943 жылы 23 қыркүйекте жаудың артиллерия-миномет оғына және әуеден үздіксіз бомбалауына қарамастан, 209-атқыштар полкі дивизияда бірінші болып қолдан жасалған құралдармен Днепр өзенінен өтті. Артиллеристер батыл кимылдап, плацдармды тез алуға көмектесті. Котельников өршелене жасалған шабуылға тойтарыс беріп отырды. 29 кыркүйекте гвардияшылар шабуылға шығып, 3 қазанда Бородаевка хуторын алды, плацдармды кеңейтіп, 9 шақырымға ілгеріледі. 1943 жылы 5 қазанда артиллеристер 8 шабуылға тойтарыс берді. Котельниковтің расчеті ірі калибрлі 2 пулемета, оқ-дәрі тиелген автокөлікті және жаудың 30-дан астам әскері мен офицерін жойды. Осы жасаған ерлігі үшін Котельниковқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (26.10.1943). Ленин орденімен, медальдармен марапатталды. Соғыстан кейін Котельников Алматы қаласында тұрды. Осы қаладағы бір көше Котельников есімімен аталады.