Ғабдолла Әшімханұлы Мейрамов

Ғабдолла Әшімханұлы Мейрамов (15. 11. 1918 жылы туған, Жезқазған облысы, Ұлытау ауданы - 26. 01. 1994, Қарағанды) — тіл білімі маманы, әдіскер, педагогика ғылымының докторы (1969), профессор (1970). Қазақ мемлекеттік университетінің филология факультетін бітірген (1944). 1944-1954 жылдары Қаскелең қазақ орта мектебінде мектеп, училище директоры. 1954 жылдан өмірінің соңына дейін Қарағанды университетінде аға оқытушы, доцент, профессор, кафедра меңгерушісі, факультет деканы. "Орыс тіліндегі грамматикалық меңгеруді қазақ мектебінің 5-класында оқыту" деген тақырыпта кандидат (1961), "Орыс тіліндегі грамматикалық меңгеруді қазақ мектебінде оқытудың жүйесі" деген тақырыпта докторлық диссертация қорғаған. Қазақ мектептерінде орыс тілін ана тіліне сүйеніп оқытудың жаңа әдістемелік жүйесін алғаш ұсынушылардың бірі. Негізгі ғылыми еңбектері осы мәселені зерттеуге арналған. Бірнеше монографиялар мен оқулықтардың, 50-ден астам мақала авторы.