Ғазиз Ағзамұлы Ешкенов

Ғазиз Ағзамұлы Ешкенов 1961 жылы 6 желтоқсанда Талдықорған облысы Кировский ауылында туған. Әкесі - Ешкенов Ағзам Рахымұлы (1932-2002), экономист болған. Анасы - Ешкенова Айман Махмүдқызы (1935-2010), педиатр болған.

Н.В. Гоголь атындағы Алматы көркемсурет училищесін (1981); Т. Жүргенов атындағы Алматы мемлекеттік театр және көркемсурет институтын бітірген (1991), монументалды кескіндеме суретшісі. Суретші-монументші.

ҚР Көркемөнер академиясының мүшесі-корреспонденті (2007 жылдан). Мемлекеттік және халықаралық бейнелеу өнерлері көрмелерінің қатысушысы (1986 жылдан). «Отқа табыну», «Суырып салма» жұмыстарының (ҚР Мәдениет министрлігінің Көркемсурет көрмелер дирекциясында сақталуда), «Жерұйық» гобеленінің (Ә. Қастеев атындағы Мемлекеттік өнер мұражайында сақталуда) авторы. «Нұр Астана» Ислам мәдениет орталығының (2005); «Шұбар» шағын ауданындағы мешіттің (2006) (Астана қаласы); Президенттік мәдениет орталығының көрме залының (2008) интерьерлерін безендіру жобаларының авторы әрі жетекшісі; Алматы метрополитенінің «Райымбек», «Алатау», «Жібек жолы» стансаларына арналған монументалды паннолардың авторы (2008-2010); Б. Момышұлы гүл бағындағы «Уақыттар әуені» тақырыбындағы саябақтық мүсіндердің біріккен авторы.

1991-2000 жылдары - Т. Жүргенов атындағы Алматы мемлекеттік театр және көркемсурет институтының «Монументалды кескіндеме» кафедрасының оқытушысы. ҚР Суретшілер одағының мүшесі (1995 жылдан). Халықаралық сәулетшілер одағының грамотасымен марапатталған.

Әскери атағы - сержант.

Үйленген. Жубайы - Бүлешова Шара Сағымбекқызы. Қызы - Лаура, ұлы - Данияр.