ҚазТрансКом

ҚазТрансКом - акционерлік қоғам. 2001 жылдың 1 тамызында бірнеше телекоммуникациялық компаниялардың - «КаспийМұнайБайланыс», «Ақтөбемұнай-байланыс» және «Байланыс» акционерлік компанияларының - бірігуі нәтижесінде құрылды. «ҚазТрансКом» акционерлік қоғамы Батыс Қазақстанның мұнай компанияларына телекоммуникациялық қызмет көрсетудің негізгі операторы болып табылады. 2004 жылы «ҚазТрансКом» акционерлік қоғамы Қазақстанның телекоммуникациялық рыногын либеризациялау бағдарламасын жүзеге асыру аясында халықаралық және қалааралық телофон байланысы бағытында қызмет көрсетуге мемлекеттік лицензия алды. Бұл акционерлік қоғамның 7 бөлімшесі бар, олар: Оңтүстік бөлімше (Алматы), Батыс бөлімше (Атырау), Шығыс бөлімше (Павлодар), Ақтөбе бөлімшесі, Астанадағы бөлімше, Орал бөлімшесі (Орал), Маңғыстау бөлімшесі (Ақтау). Бұл бөлімшелер Қазақстанның кез келген аймағында телекоммуникациялық қызмет көрсете алады. «ҚазТрансКом» акционерлік қоғамының қарамағында Қазақстан аумағын түгелімен қамтитын 200 жерсеріктік станциялар, республикадағы ең ірі жүйе болып табылатын 4 мың км-лік транкингтік байланыс торабы бар. Бұл торап 400 мың шаршы км аумақты жаба алады. Бұл аумақта республика тұрғындарының үштен бірінен астам халық тұрады және Батыс аймақтың бүкіл негізгі жол артериясы осы торап ауқымында. «ҚазТрансКом» акционерлік қоғамының арналық торабының жалпы ұзындығы 11 мың км, бұл Қазақстандағы ең ірі торап болып табылады, ол республиканың мұнай және газ өндіретін аймақтарын түгелдей қамтуға мүмкіндік береді. Мұнай мен су тасымалдау бағытындағы телекоммуникациялар рыногындағы компанияның үлесі 90 %. Автоматика жүйесі, мәліметтер беру және Қазақстанның мұнай құбырларының технологиялық байланысы бағыттарындағы компанияның үлесі 100 %. «ҚазТрансКом» акционерлік қоғамының негізгі тұтынушылары: «ҚазМұнайГаз», «ҚазТрансОйл», «Интергаз Орталық Азия», «Қазқұрылыссервис», «Өзенмұнайгаз», «Қазақойлақтөбе», «Қазақтүрікмұнай», «Теңізшевройл», «Каспий Құбыр Консорциумы», «Қазақтелеком». Жетекшілері: Жүнісов Б.А, (2000 ж.), Ержанов А.С. (2003 ж.), Абдрахманов М.А. (2004 жылдан бері).