Қазақстан Республикасының Ұлттық мемлекеттік кітап палатасы

Қазақстан Республикасының Ұлттық мемлекеттік Кітап палатасы — Қазақстанда шығатын басылымдардың жарыққа шығуына бағыт-бағдар беріп, халықаралық стандарт талабына сай тіркеуге алатын, баспа және баспасөз өнімдерін жинап, сақтайтын, статитикасын жүргізетін бірден-бір ғылыми-библиографиялық орталық болып саналады.

Ғылыми-библиографиялық көрсеткіштер шығару, баспасөз статистикасын жүргізу, жүйеленген каталогтар негізінде баспаларға, мекемелерге, жекелеген адамдарға ақпараттық-библиографиялық анықтамалар беру.

Тарихы

Қазақ КСР Мемлекеттік Кітап Палатасы Қазақстан Орталық Атқару Комитеті мен Қазақ КСР Халық Комиссарлары Кеңесінің 1937 жылғы 19 шілдедегі "Қазақ КСР Мемлекеттік Кітап Палатасын құру туралы" бірлескен Қаулысы негізінде ұйымдастырылды. Кітап Палатасы 1937-1945 жылдары Қазақстаның Оқу Халық Комиссаритына, 1945-1953 жылдар аралығында Қазақ КСР Министрлер Кеңесі жанындағы мәдени-ағарту мекемелері басқармасына, 1953-1963 жылдары Қазақстаның Мәдениет министрлігіне, ал 1963 жылдан бастап, Қазақ КСР Министрлер Кеңесінің Баспасөз жөніндегі Мемлекеттік кабинетіне бағынды. Қазақстан Республикасының Мемлекеттік Кітап Палатасы Қазақстан Республикасы Министрлер кабинетінің 6 сәуір 1993 жылғы №270 қаулысымен Қазақстан Республикасының Ұлттық Мемлекеттік Кітап Палатасы болып өзгертілді. Қазіргі кезде Қазақстан Республикасының Ұлттық мемлекеттік Кітап палатасы Қазақстан Республикасы Мәдениет және ақпарат министрлігінің құзырында.

Кітап палатасының қызметінің мақсаты - Қазақстан Республикасының Баспасөз мұрағатын, мемлекеттік библиографияның, баспасөз статистикасының республикалық ғылыми орталығын құру, орталықтандырылған каталогтендіру; республика аумағында шығатын барлық баспасөз туындыларын есепке алу және ғылыми тұрғыдан өңдеу, жөніндегі мемлекеттік бағдарламаны іске асыру және КБЖ (кітапханалық-библиографиялық жіктеу) жөніндегі функцияны орындау болып табылады.

Кітап палатасының "Баспасөз-мұрағат" қорында 5 миллионға жуық баспа өнімдерінің міндетті даналары сақталуда.

Міндеттері

• Қазақстан Республикасындағы барлық баспасөз басылымдарының міндетті даналарын Баспасөз-мұрағат қорына жинау, тіркеуге алу;
• Қазақстан Республикасының Ұлттық мемлекеттік кітап палатасындағы "Баспасөз-мұрағатындағы" баспа өнімдерінің міндетті даналардың сақталуын қамтамасыз ету;
• Еліміздегі ғылыми мекемелерді, кітапханаларды, ғылыммен айналасатын орталықтарды библиографиялық ақпаратпен, жылнамалар және көрсеткіштермен қамтамасыз ету;
• ҚР Ұлттық мемлекеттік кітап палатасының "Баспасөз-мұрағат" қорындағы баспа өнімдерінің барлық түрлерін толықтыру және сақтау;
• Қазақстан Республикасында басылып шыққан мақалалар және материалдардың негізгі түрлерінің библиографиялық өңделуін жүзеге асыру;
• Қазақстан Республикасында шығатын барлық баспа өнімдерінің (кітап,газет, журнал, изо, нота, картография басылымдары) статистикалық есебін жүргізу;
• 1917 жылдан бастап шығарылған басылымдарға, сондай-ақ 1917 жылға дейін шығарылған материалдарға арналған каталогтар мен картотека жүйесін жүргізу;
• Қазақстан Республикасы туралы шет елдерде шыққан материалдарды жинақтау;
• Қазақстанда алыс және жақын шет елдері туралы жарияланған туындыларды, материалдарды анықтау, есепке алу, библиографиялық сипаттама жасалған карточкаларды басқа кітапханаларға, ғылыми мекемелерге жіберу;
• Еліміздің мемлекеттік, қоғамдық орындардан, жеке тұлғалардан түскен сұраныс бойынша баспа өнімдерін "Баспасөз-мұрағат" қорынан алып беру;
• Баспасөз-мұрағатында сақтаулы басылымдардың электрондық көшірмесін жасау;
• Республиканың мерзімді басылымдар туралы ғылыми-зерттеу, ғылыми-практикалық семинарлар, конференциялар, "дөңгелек үстелдер" ұйымдастыру;
• Кітап көрмелері мен жәрмеңкелерді өткізуді ұйымдастыру.

Құрылымы

Бүгінде Кітап палатасының атқаратын негізі міндеттеріне сәйкес мынадай бөлімдер жұмыс істейді:

• "Әкімшілік" бөлімі
• "Қаржы және экономика" бөлімі
• "Келіп түскен міндетті дананы қабылдау және бақылау" бөлімі
• "Мемлекеттік библиография" бөлімі (қазақ және орыс топтары)
• "Анықтама-іздеу" бөлімі
• "Ретроспективтік библиография және Казахстаника" бөлімі
• "Ақпараттық технологиялар" бөлімі
• "Әдістемелік-редакциялық жұмыстар" бөлімі
• "Баспасөз-мұрағат" бөлімі
• "Кітап нарығының статистикасы және мониторингі" бөлімі

Шығарылатын басылымдар

• Кітап шежіресі
• Журнал мақалаларының шежіресі
• Газет мақалаларының шежіресі
• Рецензиялар шежіресі
• Қазақстан Республикасының баспасөзі ... Статистикалық жинақ
• Бейнелеу өнері, картография және ноталар шежіресі
• Казахстаника шежіресі
• Мерзімді және жалғасымды басылымдар шежіресі
• Қазақстан Республикасының кітап жылнамасы

Тағы қараңыз

• Қазақстан кітап палатасында тіркелген кітаптар

Сыртқы сілтемелер

• Кітап палатасының басылымдары Мұрағатталған 2 қаңтардың 2012 жылы.
• Қызметі және құрылымы Мұрағатталған 17 желтоқсанның 2011 жылы.